మన టాలీవుడ్ సినిమా ఇండస్ట్రీలో మిడిల్ రేంజ్ హీరోలకి సాలీడ్ హిట్ పడి చాలా కాలమవుతోంది. నాని నటించిన సినిమాలు బాక్సాఫీస్ వద్ద ఆశించిన విజయాలను అందుకోలేకపోతున్నాయి. నాగ శౌర్య హిట్ అనే పదం విని చాలా ఏళ్ళవుతోంది. శర్వానంద్ ఇటీవల బైకర్ సినిమాతో వచ్చాడు. సినిమా బావున్నప్పటికీ బ్రేకీవెన్ కాలేదనేది ఇండస్ట్రీ టాక్. నిఖిల్ లాంటి వాళ్ళు పాన్ ఇండియా సినిమా అంటూ చాలా గ్యాప్ తీసుకుంటున్నారు.
ఈ క్రమంలో రౌడీ హీరోగా క్రేజ్ తెచ్చుకున్న విజయ్ దేవరకొండ భారీ చిత్రాలనైతే చేస్తున్నాడు గానీ, హిట్ కోసం మాత్రం ఎదురుచూడక తప్పడం లేదు. ఇటీవల కాలంలో చేసిన సినిమాలేవి విజయ్ కి సక్సెస్ ని ఇవ్వలేదు. ఖుషి, ది ఫ్యామిలీ స్టార్, లైగర్, కిండం..ఇలా మంచి అంచనాలతో వచ్చిన సినిమాలు బాక్సాఫీస్ వద్ద సత్తా చాటలేకపోయాయి. విజయ్ దేవరకొండకి ఉన్న ప్లస్ పాయింట్ ..క్లాస్ సినిమాలు చేసి హిట్ కొట్టగలడు..మాస్ సినిమాలు చేసి హిట్ కొట్టగలడు.
ఆ విషయం, పెళ్లి చూపులు..గీత గోవిందం..అర్జున్ రెడ్డి, టాక్సీవాలా లాంటి సినిమాలతో అందరికీ అర్థమైంది. కానీ, యాక్షన్ సినిమాలు మాత్రం మన రౌడీ హీరోకి కలిసి రావడం లేదు. పూరి జగన్నాధ్ దర్శకత్వంలో వచ్చిన లైగర్ మొదటి పాన్ ఇండియా సినిమా. దీని మీద భారీ అంచనాలు పెట్టుకుంటే భారీ డిజాస్టర్ గా నిలిచింది. అలాగే, కింగ్డం సినిమా. ప్రమోషన్స్ విషయంలో ఈ మూవీకి బాగా క్రేజ్ వచ్చింది. తీరా బాక్సాఫీస్ వద్ద రిలీజ్ అయ్యాక ఒక్క షోతో అంచనాలు అన్నీ మారిపోయాయి. ఇప్పుడు, మళ్ళీ ఇలాంటి యాక్షన్ జోనర్ సినిమానే చేస్తున్నాడు. ఇది రిస్కేనా? అనేది ఇప్పుడు చర్చలో నిలిచింది.
రవి కొరణ్ కోలా దర్శకత్వంలో విజయ్ దేవరకొండ, కీర్తి సురేష్ జంటగా దిల్ రాజు రౌడీ జనార్ధన చిత్రాన్ని నిర్మిస్తున్నాడు. ఈ మూవీ గ్లింప్స్ చూశాక అంచనాలైతే పెరిగాయి గానీ, యాక్షన్ సినిమా అని అర్థమయ్యేసరికి కొన్ని సందేహాలు కలుగుతున్నాయి. మరీ ముఖ్యంగా, విజయ్-కీర్తి కాంబో సెట్ అవుతుందా? అని. మరి, దర్శకుడు ఎలాంటి కథా నేపథ్యాన్ని ఎంచుకున్నాడో..అందులో విజయ్ పాత్ర ఎంత పవర్ఫుల్ గా ఉంటుందో..ఇప్పటి వరకూ వచ్చిన సినిమాలకంటే.. రౌడీ జనార్ధన లో కొత్తగా ఉన్న కంటెంట్ ఏంటో ట్రైలర్..ఇతర ప్రమోషనల్ కంటెంట్ బయటకు వస్తే గానీ క్లారిటీ రాదు. మరి, ఈ మూవీతోనైనా మన రౌడీ హీరో హిట్ కొట్టి సక్సెస్ ట్రాక్ ఎక్కుతాడా లేదా చూడాలి.