నాగచైతన్య, సమంతల వైవాహిక బంధానికి తెరపడింది. తాము విడిపోతున్నట్లు సోషల్‌ మీడియా వేదికగా సమంత ప్రకటించింది. ఇదే విషయాన్ని నాగచైతన్య కూడా ట్విటర్‌ ద్వారా వెల్లడించారు. ఎంతో ఆలోచించి ఈ నిర్ణయం తీసుకున్నట్లు తెలిపారు.
‘మా శ్రేయోభిలాషులందరికీ.. ఇక నుంచి మేం భార్య-భర్తలుగా దూరంగా ఉండాలనుకుంటున్నాం. చాలా చర్చలు, ఆలోచనల తర్వాత విడిపోవాలని ఈ నిర్ణయం తీసుకున్నాం. ఇక నుంచి వేర్వేరుగా మా సొంత మార్గాల్లో ప్రయాణించాలనుకుంటున్నాం.
దశాబ్ద కాలంగా మా స్నేహం కొనసాగినందుకు మేం అదృష్టవంతులం. ఇప్పుడు ఈ కష్ట సమయంలో అభిమానుల మద్దతు కావాలి. మా గోప్యతను కాపాడాలని శ్రేయోభిలాషులు, మీడియాకు విజ్ఞప్తి చేస్తున్నాం’అని నాగచైతన్య ట్వీట్‌ చేశారు.