సౌత్ ఇండియా పోర్న్ స్టార్ గా గుర్తింపు దక్కించుకున్న షకీలా 90వ దశకంలో ప్రేక్షకులను తెగ ఆకట్టుకుంది. స్టార్ హీరోల సినిమాలకు సైతం ఈమె సవాల్ విసిరింది. కేవలం తన ఇమేజ్ తో అద్బుతమైన వసూళ్లను రాబట్టి సౌత్ స్టార్, సూపర్ స్టార్ అంటూ అప్పట్లోనే అనిపించుకున్న షకీలా ఆ తర్వాత కాలంలో పెద్దగా సినిమాల్లో ఛాన్స్ లు రాకపోవడంతో ఆర్థిక ఇబ్బందులకు లోనైంది. అడపా దడపా చిత్రాలు చేసుకుంటూ కెరీర్ను సాగిస్తూ వస్తున్న షకీలా జీవితం గురించి అసలు విషయాలను చెప్పేందుకు సిద్దం అవుతున్నట్లుగా షకీలా బయోపిక్ దర్శకుడు ఇంద్రజిత్ లంకేష్ అంటున్నాడు. షకీలా గురించి ప్రేక్షకులకు కేవలం 25 శాతం మాత్రమే తెలుసు. ఆమె గురించి తెలియని విషయాలు ఎన్నో ఉన్నాయి. వాటన్నింటికి తమ సినిమాతో ప్రేక్షకుల ముందుకు తీసుకు వచ్చేందుకు ప్రయత్నాలు చేస్తున్నట్లుగా దర్శకుడు పేర్కొన్నాడు.
‘షకీలా’ బయోపిక్ చిత్రంలో షకీలాగా రీచా చద్దా నటిస్తున్న విషయం తెల్సిందే. తాజాగా చిత్రీకరణ చివరి దశకు చేరుకుంది. ఈ సందర్బంగా చిత్ర యూనిట్ సభ్యులు టైటిల్ లోగోను ఆవిష్కరించారు. అద్బుతమైన స్క్రీన్ప్లేతో చాలా కొత్త తరహాలో సినిమాకు సంబంధించిన స్క్రీన్ప్లేను చేస్తున్నట్లుగా సమాచారం అందుతుంది. షకీలా హీరోయిన్గా అప్పట్లో నటించి సూపర్ హిట్ అయిన సినిమాల చిత్రీకరణ సీన్స్ను ఈ చిత్రం కోసం చేస్తున్నట్లుగా చిత్ర యూనిట్ సభ్యులు చెబుతున్నారు.
షకీలా నెల్లూరు జిల్లాలో పుట్టి సినిమాల్లోకి వెళ్లిన తీరు, ఆ తర్వాత సినిమాల్లో ఆమె బి గ్రేడ్ నటిగా మారిపోవడం వంటి విశేషాలను ఈ చిత్రంలో చూపించబోతున్నారు. ప్రస్తుతం షకీలా పరిస్థితి ఏంటీ, ఆమె ఎలా జీవిస్తోంది, ఆమె పెళ్లి చేసుకోక పోవడానికి గల కారణం ఏంటీ అనే విషయాలను కూడా ఈ చిత్రంలో చూపించబోతున్నట్లుగా సినీ వర్గాల ద్వారా సమాచారం అందుతుంది. హిందీలో రూపొందుతున్న ఈ చిత్రం తెలుగు మరియు తమిళంలో కూడా భారీ ఎత్తున విడుదల కాబోతుంది. మలయాళంలో ఈ చిత్రం విడుదలకు అనుమతించవద్దని సినీ వర్గాల వారు అంటున్నారు.
