బంగ్లాదేశ్ సార్వత్రిక ఎన్నికల్లో ప్రస్తుత ప్రధాని షేక్ హసీనా పార్టీ అవామీ లీగ్ ఘన విజయం సాధించింది. మూడింట రెండొంతుల స్థానాలను కైవసం చేసుకుంది. ప్రస్తుత ప్రధాని షేక్ హసీనా వరుసగా నాలుగోసారి, మొత్తంగా ఐదోసారి ఆ దేశ పగ్గాలు చేపట్టనున్నారు. పార్లమెంట్లో 300 స్థానాలకు గానూ 299 నియోజకవర్గాలకు ఎన్నికలు జరిగాయి.
ఈ ఎన్నికల్లో అవామీ లీగ్ 200 సీట్లలో గెలిచిందని ఎన్నికల సంఘం ప్రతినిధి వెల్లడించారు. కౌంటింగ్ ఇంకా కొనసాగుతోందని తెలిపారు. ఇప్పటివరకు వెలువడిన ఫలితాల ఆధారంగా అవామీ లీగ్ను విజేతగా ప్రకటిస్తున్నామని ఎలక్షన్ కమిషన్ ప్రతినిధి చెప్పారు. మిగిలిన నియోజకవర్గాల కౌంటింగ్ పూర్తయ్యాక తుది ఫలితాలు వెల్లడిస్తామని అన్నారు.
ప్రధాని షేక్ హసీనా తాను పోటీ చేసిన గోపాల్‌గంజ్‌-3 స్థానంలో భారీ మెజారిటీతో గెలుపొందారు. హసీనాకు 2,49,965 ఓట్లు వచ్చాయి. ఆమె సమీప అభ్యర్థి బంగ్లాదేశ్ సుప్రీం పార్టీకి చెందిన ఎం నిజాముద్దీన్ లష్కర్కు 469 ఓట్లు మాత్రమే వచ్చాయి. 1986 నుంచి ఇప్పటి వరకు వరుసగా ఎనిమిదోసారి ఆ స్థానం నుంచి పోటీ చేసిన హసీనా విజయం సాధించారు.
