తెలంగాణ పీసీసీ అధ్యక్షుడిగా రేవంత్ రెడ్డి ఇవాళ బాధ్యతలు స్వీకరించనున్నారు. మరికాసేపట్లో హైదరాబాద్ గాంధీభవన్‌లో ప్రమాణ స్వీకార కార్యక్రమం జరగనుంది. దీంతో రేవత్ అభిమానులు ఫుల్ జోష్‌లో ఉన్నారు. నగరంలో కాంగ్రెస్ పార్టీ కార్యకర్తలు, రేవంత్ అభిమానులు భారీ ఎత్తున ఫ్లెక్సీలు ఏర్పాటు చేశారు. రేవంత్‌కు శుభాకాంక్షలు చెబుతూ అభిమానాన్ని చాటుకున్నారు.
అయితే బంజారాహిల్స్ రోడ్ నెం. 2లో ఏర్పాటు చేసిన ఫ్లెక్సీలను జీహెచ్ఎంసీ అధికారులు తొలగించారు. రేవంత్ ప్రమాణ స్వీకారం చేస్తున్న రోజున ఈ ఘటన జరగడంతో అధికారుల తీరుపై రేవంత్ అభిమానులు మండిపడుతున్నారు.
మరి టీఆర్ఎస్ నేతల ఫ్లెక్సీల విషయంలో జీహెచ్ఎంసీ అధికారులు చూసీ చూడనట్లు ఎందుకు వ్యవహరిస్తున్నారంటూ ప్రశ్నిస్తున్నారు. ప్రతిపక్షం ఏర్పాటు చేసిన ప్లెక్సీలను ఉద్దేపూర్వకంగానే తొలగిస్తున్నారన్న విమర్శలు వస్తున్నాయి. ఇటీవలే షర్మిల పార్టీ ఆఫీసు లోటస్ పాండ్ వద్ద కూడా జీహెచ్ఎంసీ అధికారులు ఫ్లెక్సీలను తొలగించిన విషయం తెలిసిందే.
మరోవైపు రేవంత్ ప్రమాణ స్వీకారానికి ఏర్పాట్లు పూర్టయ్యాయి. మరికాసేపట్లో రేవంత్ కొత్త పీసీసీ చీఫ్‌గా బాధ్యతలు స్వీకరించనున్నారు.కాంగ్రెస్ పార్టీకి చెందిన సీనియర్ నేతలందర్ని రేవంత్ స్వయంగా ఆహ్వానించారు. కర్నాటక కాంగ్రెస్ నేతలు కూడా ఈ ప్రమాణ స్వీకారోత్సవానికి ముఖ్య అతిథులుగా హాజరుకానున్నారు.