‘దళితబంధు’ పథకంపై తెలంగాణ సర్కార్ మరో కీలక నిర్ణయం తీసుకుంది. రాష్ట్రమంతగా దీన్ని అమలు చేసేందుకు కసరత్తు ముమ్మరం చేసింది. నియోజకవర్గానికి 100 కుటుంబాలు చొప్పున ఒక్కొక్కరికి రూ.10లక్షల యూనిట్లు మంజూరు చేయనుంది. హుజురాబాద్ నియోజకవర్గంలో ఇప్పటికే ఈ పథకాన్ని అమలు చేసినందున మిగిలిన 118 నియోజకవర్గంలో జనవరి నుంచి అబ్ధిదారులను గుర్తించి, మార్చి నాటికి యూనిట్లు ఏర్పాటయ్యేలా నిధులు విడుదల చేసేందుకు ఏర్పాట్లు చేస్తోంది.
దళితబంధు పైలట్ ప్రాజెక్టు కింద అదనంగా గుర్తించిన చింతకాని, తిరుమలగిరి, చారకొండ, నిజాంసాగర్ మండలాల్లో ఈ పథకం అమలు కోసం ఇప్పటికే ప్రభుత్వం రూ.250 కోట్లు విడుదల చేసింది. అయితే రాష్ట్రమంతగా ఈ పథకాన్ని అమలు చేయాలంటే రూ.1,180 కోట్లు అవసరమని ప్రభుత్వం అంచనా వేస్తోంది. దళితబంధు అమలు కోసం ముఖ్యమంత్రి కేసీఆర్ పరిశీలనలో రెండు ప్రతిపాదనలు ఉన్నట్లు తెలిసింది. నియోజకవర్గానికి 100 మందిని ఎమ్మెల్యేల ఆధ్వర్యంలో ఎంపిక చేయాలా? లేదా వంద కుటుంబాలు వచ్చేలా ఒకటి లేదా రెండు గ్రామాలను ఎంపిక చేసి దళితబంధు ఆదర్శ గ్రామాల కింద ప్రకటించి అమలు చేయాలా? అనే విషయమై కేసీఆర్ నిర్ణయం తీసుకోనున్నట్లు తెలుస్తోంది.