పెంచిన డిగ్రీ, పీజీ ఫీజులను తగ్గించాలని డిమాంగ్ చేస్తూ ABVP ఆధ్వర్యంలో విద్యార్థులు చేపట్టిన ఆందోళన ఉద్రిక్తతకు దారితీసింది. ఫీజులు తగ్గించాలని ఓయూ పరిపాలన భవనం ముందు విద్యార్థులు ధర్నా చేశారు. వర్సిటీ పరిధిలోని కాలేజీల నుంచి వందల మంది విద్యార్థులు యూనివర్సిటీ పరిపాలన భవనం ముందు ధర్నాకు దిగడంతో పోలీసులను భారీగా మోహరించారు. వందల సంఖ్యలో ఉన్న విద్యార్థులు పోలీసులను, సెక్యూరిటీ సిబ్బందిని నెట్టుకుని పరిపాలన భవనంలోకి చొచ్చుకెళ్లేందుకు ప్రయత్నించడం తీవ్ర ఉద్రిక్తతకు దారితీసింది.
ఉస్మానియా, కాకతీయ, JNTU, హైదరాబాద్ సహా మహాత్మ గాంధీ యూనివర్సిటీలలో ఇంజనీరింగ్, ఫార్మసీ, పీజీ కోర్సు ఫీజులు భారీ మొత్తంలో పెంచుతూ నిర్ణయం తీసుకోవడం అన్యాయమని విద్యార్థుల మండిపడ్డారు. వందేళ్ చరిత్ర కలిగిన ఉస్మానియాలో ఎంఏ రెగ్యులర్ కోర్సుల ఫీజు రూ.2,800 నుంచి రూ.14,000కి పెంచారని.. రూ.3800గా ఉన్న సెల్ఫ్ ఫైనాన్స్ కోర్సులకు రూ.21,000లకు పెంచారన్నారు. ఎంకామ్‌కి రూ.30 వేలు, ఎంబీఏకి రూ. 35 వేలు, ఎమ్మెస్సీ సైన్స్ కోర్సులకు రూ.3,800 నుంచి రూ.20,490, సెల్ఫ్ ఫైనాన్స్ కోర్సులకు రూ.35 వేలకు పెంచారని విద్యార్థి నేతలు అభ్యంతరం వ్యక్తం చేశారు.
ఇంజనీరింగ్ కోర్స్ ఫీజులను భారీగా పెంచారని.. ఏకంగా రూ. 18 వేల నుంచి 35 వేల వరకూ.. సెల్ఫ్ ఫైనాన్స్ కోర్సుల ఫీజు 75 వేలకు పెంచారని విద్యార్థులు తెలిపారు. ఆర్టిఫీషియల్ ఇంటెలిజెన్స్ కోర్సు ‘ఫీ’ అయితే ఏకంగా లక్షా ఇరవై వేల రూపాయలకు పెంచారని ఆగ్రహం వ్యక్తం చేశారు. వర్సిటీ వ్యాపార విధానాలను అనుసరిస్తోందంటూ తీవ్రస్థాయిలో ధ్వజమెత్తారు. పెంచిన ఫీజులను వెంటనే తగ్గించాలని.. హాస్టల్స్ సమస్యలు పరిష్కరించాలని డిమాండ్ చేస్తూ ధర్నాకు దిగడంతో టెన్షన్ చోటుచేసుకుంది.
విద్యార్థులను అడ్డుకునే క్రమంలో పోలీసులకు, విద్యార్థులకు నడుమ తోపులాట జరిగింది. ఒక్కసారిగా గేట్లు నెట్టివేసి.. పోలీసులను పక్కకు తోసేసి విద్యార్థులు పరిపాలన భవనంలోకి పరుగులు తీశారు. పరిపాలన భవనం అద్దాలు ధ్వంసం చేశారు. వీసీ చాంబర్ ఎదుట ఆందోళనకు దిగారు. ఫీజులు తగ్గించాల్సిందేనంటూ ఆందోళన చేస్తున్నారు. దీంతో ఓయూ క్యాంపస్‌లో ఉద్రిక్త పరిస్థితులు ఏర్పడ్డాయి.