తెలంగాణాలో బాణాసంచా నిషేధిస్తూ హైకోర్టు ఇచ్చిన తీర్పును సవరిస్తూ సుప్రీంకోర్టు మధ్యంతర ఉత్తర్వులు జారీ చేసింది. తెలంగాణలో గ్రీన్ క్రాకర్స్ కాల్చేందుకు సుప్రీంకోర్టు అనుమతించింది. క్రాకర్స్ కాల్చడంతో పాటుగా కొనుగోలు, అమ్మకాలపై హైకోర్టు నిషేధం విధించిన సంగతి తెలిసిందే. దీన్ని సవాల్ చేస్తూ తెలంగాణ క్రాకర్స్ అసోసియేషన్ సుప్రీంకోర్టులో లంచ్ మోషన్ పిటిషన్ దాఖలు చేసింది.
దీన్ని విచారణకు స్వీకరించిన సుప్రీంకోర్టు కీలకమైన ఆదేశాలు జారీ చేసింది. తెలంగాణలో గ్రీన్ క్రాకర్స్ కాల్చేందుకు మాత్రమే అనుమతిచ్చింది. అదే మాదిరిగా వ్యాపారస్తులు గ్రీన్ క్రాకర్స్ మాత్రమే అమ్మకాలు జరపాలని చెప్పింది. అయితే నేషనల్ గ్రీన్ ట్రిబ్యునల్ ఇచ్చిన తీర్పుకు లోబడే క్రాకర్స్ కొనుగోలు, అమ్మకాలు, కాల్చడం జరగాలని తెలిపింది. పర్యావరణ హితం ఉండేవిధంగా గ్రీన్ క్రాకర్స్ మాత్రమే అనుమతించాలని తెలిపింది.
మరోవైపు దీపావళి రోజున రెండు గంటలు మాత్రమే క్రాకర్స్ కాల్చేందుకు అనుమతించాలని చెప్పింది. దీనిని తెలంగాణ ప్రభుత్వం ఎన్ని గంటలు అనే విషయాన్ని నోటిఫై చేసి ప్రకటన చేయాలంటూ సుప్రీం ధర్మాసనం తెలిపింది. సుప్రీంకోర్టులో తెలంగాణ క్రాకర్స్ అసోసియేషన్‌కి ఊరట లభించడంతో అమ్మకాలు మళ్లీ జోరందుకున్నాయి.
నేషనల్ గ్రీన్ ట్రిబ్యునల్ తీర్పునకు లోబడి హైకోర్టు ఆదేశాలుండాలని సుప్రీంకోర్టు వెల్లడించగా.. నవంబర్ 9న బాణాసంచా వినియోగంపై జాతీయ హరిత ట్రిబ్యున్ (ఎన్జీటీ) తీర్పునిచ్చింది. గాలి నాణ్యత తీవ్రంగా పడిపోయిన చోట బాణాసంచా పూర్తిగా నిషేధమని ఎన్జీటీ ఆదేశించింది. గాలి నాణ్యత మధ్యస్తంగా ఉన్నచోట పర్యావరణహిత (గ్రీన్ క్రాకర్స్) బాణాసంచా వినియోగించవచ్చు. గ్రీన్ క్రాకర్స్ కూడా గరిష్టంగా 2 గంటలు మాత్రమే వినియోగించాలి. స్థానిక యంత్రాంగం వినియోగించే సమయాన్ని కేటాయించాలని ఎన్జీటీ తీర్పులో వెల్లడించింది.
గురువారం తెలంగాణ హైకోర్టు చేసిన ఆదేశాల మేరకు ప్రభుత్వం శుక్రవారం టపాసుల షాపుల మూసేయాలని ఉత్తర్వులు జారీ చేసింది. దీంతో తెలంగాణ క్రాకర్స్ అసోసియేషన్ సుప్రీంకోర్టును ఆశ్రయించింది.