షావోమి భారతదేశంలో నేడు స్మార్టర్ లివింగ్ ఈవెంట్ ను నిర్వహించనుంది. ఇందులో భాగంగా పలు ఉత్పత్తులను లాంచ్ చేయనుంది. వీటిలో 65 అంగుళాల ఎంఐ టీవీ, ఎంఐ బ్యాండ్ 4, మొదటిసారిగా లాంచ్ చేయబోతున్న వాటర్ ప్యూరిఫయర్ ఉన్నాయి. నేడు విడుదల చేయబోయే 65 అంగుళాల ఎంఐ టీవీ ఇప్పటిదాకా షావోమి భారతదేశంలో విడుదల చేసిన టీవీలన్నిటి కంటే అతి పెద్దది.
ఈ షావోమి స్మార్టర్ లివింగ్ 2020 కార్యక్రమం కంపెనీ వెబ్ సైట్ లో ప్రత్యక్షప్రసారం కానుంది. అలాగే సంస్థకు చెందిన అధికారిక సామాజిక మాధ్యమాల్లో, యూట్యూబ్ లో కూడా ఈ కార్యక్రమం ప్రత్యక్ష ప్రసారం కానుంది. మధ్యాహ్నం 12 గంటలకు ఈ ప్రత్యక్ష ప్రసారం ప్రారంభం అవుతుంది. అయితే ఎంఐ బ్యాండ్ 4 లాంచ్ అయిన అనంతరం తమ వెబ్ సైట్ లో అందుబాటులో ఉంటుందని అమెజాన్ ప్రకటించింది.
ఇది కూడా 4K ఎల్ఈడీ ప్యానెల్ తోనే మార్కెట్లోకి రానుంది. ఈ సంవత్సరంలో షావోమి ఇప్పటికే 55 అంగుళాల ఎంఐ ఎల్ఈడీ టీవీ 4X ప్రోను విడుదల చేసింది. తాజాగా విడుదల కాబోయే టీవీ నెట్ ఫ్లిక్స్ సపోర్ట్ తో రాబోతుందని షావోమి తెలిపింది. అలాగే ఇప్పటికే మార్కెట్లో ఉన్న మిగతా టీవీలకు కూడా నెట్ ఫ్లిక్స్ సపోర్ట్ అందిస్తామని ప్రకటించింది. అయితే ఏయే టీవీలకు నెట్ ఫ్లిక్స్ అందుబాటులోకి రానుందనే వివరాలు మాత్రం వెల్లడించలేదు.