ప్రియురాలి తల్లి తమ పెళ్లికి ఒప్పుకోలేదన్న కోపంతో ఓ యువకుడు స్నేహితుడితో కలిసి విధ్వంసం సృష్టించాడు. ఇద్దరూ కలిసి ఆటోలను, కార్లను, ద్విచక్ర వాహనాలను ధ్వంసం చేశారు. ఈ సంఘటన మహారాష్ట్రలోని పూణెలో బుధవారం చోటుచేసుకుంది. పోలీసులు తెలిపిన వివరాల మేరకు.. శరత్‌ తుకారామ్‌ పటోల్‌ అనే యువకుడు అన్నాభవూ సతేనగర్‌, బిద్వేవాడికి చెందిన ఓ యువతి గత కొన్ని సంవత్సరాలుగా ప్రేమించుకుంటున్నారు. ఈ నేపథ్యంలో బుధవారం ఇద్దరి పెళ్లి విషయం మాట్లాడటానికి అతడు ప్రియురాలి ఇంటికి వెళ్లాడు. ప్రియురాలిని తన కిచ్చి పెళ్లి జరిపించాలని ఆమె తల్లిని అడిగాడు. ఇందుకు ఆమె ససేమీరా అంది.
దీంతో ఆగ్రహించిన అతడు స్నేహితుడితో కలిసి ఇంటి చుట్టు ప్రక్కల నిలిపి ఉంచిన వాహనాలపై విరుచుకుపడ్డాడు. ఆటోలు, కార్లు, ద్విచక్ర వాహనాలను ధ్వంసం చేశాడు. దీంతో చుట్టుప్రక్కలి వారు పోలీసులకు సమాచారం అందించారు. అక్కడకు చేరుకున్న పోలీసులు యువతిని, ఆ ఇద్దరు యువకుల్ని విచారించారు. యువకులు తామే నేరం చేశామని ఒప్పుకున్నారు. దీనిపై కేసు నమోదు చేసిన పోలీసులు ఆ తర్వాత ఇద్దరినీ కోర్టులో హాజరు పరిచారు.