టీడీపీ అధినేత చంద్రబాబుపై ఎంపీ విజయసాయిరెడ్డి మండిపడ్డారు. ఢిల్లీ పర్యటనకు ఎందుకు వెళ్లారో చెప్పాలన్నారు. పట్టాభి తిట్లను సమర్థించుకోవడానికి వచ్చారా.. ఏపీ పరువు తీశామని చెప్పుకోవడానికి చంద్రబాబు ఢిల్లీ వచ్చారా.. పట్టాభి బూతు పురాణం వీడియోను రాష్ట్రపతికి ఇచ్చారా.. వ్యవస్థలను మేనేజ్ చేయడానికి ఢిల్లీ వచ్చారా అంటూ ప్రశ్నించారు. చంద్రబాబు హోంమంత్రి అపాయింట్‌మెంట్ అడిగితే ఇవ్వలేదన్నారు.
అసాంఘిక శక్తులకు రారాజు చంద్రబాబు అన్నారు. ఉద్దేశపూర్వకంగా పట్టాభితో తిట్టించారని.. చంద్రబాబు 36 గంటల పాటూ బూతు దీక్ష చేశారని మండిపడ్డారు. గంజాయి వ్యాపారంలో లోకేష్‌కు భాగస్వామ్యం ఉందని ప్రజలకు తెలుసన్నారు. ఆర్టికల్ 356ను రద్దు చేయాలని గతంలో కోరిన చంద్రబాబు.. ఇప్పుడు అదే కావాలంటున్నారన్నారు. ప్రజల్ని మోసగించే ప్రయత్నాలను చంద్రబాబు మార్చుకోవాలన్నారు.
చంద్రబాబు హస్తిన పర్యటనపై ట్విట్టర్ వేదికగా స్పందించారు. ‘ఢిల్లీ ఎయిర్‌పోర్ట్‌లో చంద్రబాబు అడుగు పెట్టగానే పులి దిగింది, సింహం దిగిందంటూ అరువు నినాదాలు. పడిగాపులు కాసినా కేంద్ర పెద్దల అపాయింట్మెంట్లు లేవు. మీడియా పట్టించుకోలేదు. అతని నైజం తెలియడంతో ఏ పార్టీ కూడా దరిచేరనీయలేదు. హడావుడి చేద్దామని వచ్చి అభాసుపాలై ఢిల్లీ నుంచి జారుకున్నాడు’అంటూ సెటైర్లు పేల్చారు.