పరుగుల వీరుడు, టీమిండియా కెప్టెన్ విరాట్ కోహ్లీ 33వ పుట్టిన రోజు సందర్భంగా సోషల్‌ మీడియాలో విషెస్‌ వెల్లువలా వచ్చిపడుతున్నాయి. అటు అభిమానులు, ఇటు సహచర ఆటగాళ్లు కోహ్లీకి శుభాకాంక్షలు అందిస్తున్నారు. ఈ నేపథ్యంలో ఐపీఎల్‌ ఆర్‌సీబీ సహ ఆటగాడు మహ్మద్ సిరాజ్ ఒక వీడియోద్వారా విరాట్‌కు సర్‌ప్రైజ్‌ విషెస్‌ అందించాడు. హ్యాపీ హ్యాపీ బర్త్‌డే అంటూ ఇన్‌స్టాలో ఒక వీడియో పోస్ట్‌ చేశాడు. దీంతో ఈ వీడియో అభిమానులను ఆకట్టుకుంటోంది.
మరోవైపు టీ20 ప్రపంచ కప్‌ జట్టుకు నాయకత్వం వహిస్తున్న కోహ్లీకి పలువురు పుట్టినరోజు శుభాకాంక్షలు తెలుపుతున్నారు. భారత మాజీ ఓపెనర్ వీరేంద్ర సెహ్వాగ్ వీరేంద్ర సెహ్వాగ్, బీసీసీఐ, ఐసీసీ, యూసుఫ్ పఠాన్, అజింక్యా రహానే , వసీం జాఫర్‌ తదితరులు శుభాకాంక్షలు తెలిపారు. దుబాయ్‌లో నేడు కీలకమై పోటీ జరగనుంది. సూపర్ 12 పోరులో మెన్ ఇన్ బ్లూ స్కాట్లాండ్‌తో తలపడుతుంది. ఈ మ్యాచ్‌లో ఎలాగైనా విజయం సాధించాలనే లక్ష్యంతో కోహ్లీ సేన కసరత్తు చేస్తోంది.
కాగా 1988 నవంబర్‌ 5 వ తేదీన ఢిల్లీలో జన్మించిన విరాట్ కోహ్లీ అంచెలంచెలుగా ఎదిగి టీం ఇండియా సారధిగా ఎదిగాడు. 2008లో అరంగేట్రం చేసిన కోహ్లీ అనేక రికార్డులను నమోదు చేశాడు. టెస్టుల నుంచి వన్డే, టీ2 వరకు ఐసీసీ ర్యాంకింగ్స్‌లో నంబర్ 1 బ్యాట్స్‌మెన్‌గా నిలిచిన ఏకైక భారత బ్యాట్స్‌మెన్‌గా విరాట్ కోహ్లీ నిలిచిన సంగతి తెలిసిందే.