టీమిండియాతో జరుగుతున్న పింక్‌ టెస్టులో ఆస్ట్రేలియా తొలి ఇన్నింగ్స్‌లో తడబడుతుంది. 84 పరుగులకే కీలకమైన 5 వికెట్లు కోల్పోయి కష్టాల్లో పడింది. భారత బౌలర్ల కట్టుదిట్టమైన బౌలింగ్‌కు ఆసీస్‌ ప్రధాన బ్యాట్స్‌మెన్‌ పెవిలియన్‌కు క్యూ కట్టారు. మూడు సార్లు అవుటయ్యే ప్రమాదం నుంచి తప్పించుకున్న మార్నస్‌ లబుషేన్‌ 43 పరుగులతో, కెప్టెన్‌ టిమ్‌ పైన్‌ 4 పరుగులతో ఆడుతున్నారు.
టీమిండియా స్పిన్నర్‌ రవిచంద్రన్‌ అశ్విన్‌ 3 వికెట్లు తీయగా.. బుమ్రా రెండు వికెట్లు తీశాడు. ఇక టీమిండియా కెప్టెన్‌ విరాట్‌ కోహ్లి బ్యాటింగ్‌లోనే కాదు ఫీల్డింగ్‌లోనూ ఇరగదీస్తున్నాడు. అశ్విన్‌ బౌలింగ్‌లో కామెరాన్‌ గ్రీన్‌ ఇచ్చిన క్యాచ్‌ను కోహ్లి అద్భుతంగా డ్రైవ్‌ చేస్తూ ఒడిసి పట్టుకున్నాడు. ఈ సూపర్ క్యాచ్‌ దెబ్బకు ఆసీస్‌ 5వ వికెట్‌ కోల్పోయింది.
వన్డేల్లో మంచి ప్రదర్శన కనబరిచిన స్టీవ్‌ స్మిత్‌ను కేవలం ఒక్క పరుగు మాత్రమే చేసి అశ్విన్‌ బౌలింగ్‌లో వెనుదిరగడం భారత్‌కు సానుకూలాంశంగా మారింది. స్టీవ్‌ స్మిత్‌ భారత్‌పై ఇప్పటివరకు 21 ఇన్నింగ్స్‌లు ఆడగా.. 5 పరుగులలోపు అవుట్‌ కావడం ఇదే తొలిసారి. టీమిండియా తొలి ఇన్నింగ్స్‌లో 244 పరుగులకు ఆలౌట్‌ అయిన సంగతి తెలిసిందే. కోహ్లి 74 పరుగులతో టాప్‌ స్కోరర్‌గా నిలవగా.. రహానేతో సమన్వయ లోపంతో కోహ్లి రనౌట్‌గా వెనుదిరగడం అభిమానులను నిరాశ పరిచింది.