సమయం దొరికిన ప్రతిసారి భారత్ను అవమానించేందుకు ప్రయత్నిస్తోంది ఖలిస్థానీ గ్రూప్. ఇక ఇప్పుడు ఏకంగా ప్రత్యక్ష బెదిరింపులకు దిగింది. పార్లమెంట్ భవనంపై దాడి చేస్తానని ఖలీస్థానీ ఉగ్రవాది, నిషేధిత సిఖ్స్‌ ఫర్‌ జస్టిస్‌ నేత గురుపత్వంత్ సింగ్ పన్నూ బెదిరించాడు. 2001లో పార్లమెంట్పై దాడి చేసిన రోజైన డిసెంబర్ 13న లేదా అంతకంటే ముందే మళ్లీ పార్లమెంటుపై దాడికి పాల్పడతామని ఓ వీడియోను విడుదల చేశారు. పన్నూ బెదిరింపు వీడియోతో కేంద్ర నిఘా సంస్థలు అప్రమత్తమయ్యాయి.
అయితే ఇటీవలే గురుపత్వంత్ సింగ్ పన్నూను హత్య చేయడానికి కుట్రలు జరిగినట్లు వార్తలు వచ్చిన విషయం తెలిసిందే. ఈ నేపథ్యంలో ఈ వీడియో రావడం ప్రస్తుతం చర్చనీయాంశమవుతోంది. ఈ వీడియోలో 2001 పార్లమెంట్ దాడికి సూత్రధారి అయిన అఫ్జల్ గురు ఫొటోతో పాటు దిల్లీ బనేగా ఖలిస్థానీ (దిల్లీని ఖలిస్థానీగా మారుస్తాం) అనే నినాదం ఉన్న పోస్టర్ను పట్టుకుని ఉన్నాడు పన్నూ. తనను హత్య చేయడానికి భారత సంస్థలు చేసిన కుట్రలు విఫలమయ్యాయని పేర్కొంటూ.. తనపై కుట్రలకు సమాధానంగా డిసెంబర్ 13కు ముందు పార్లమెంట్పై దాడి చేస్తానని చెప్పాడు.
