తనను ప్రేమించి పెళ్లి చేసుకుంటానని మాటిచ్చిన యువకుడు మరో పెళ్లికి సిద్ధం కావడంతో ఆ యువతి ఆవేశంతో రగిలిపోయింది. నేరుగా కళ్యాణ మండపానికి వెళ్లి హల్‌చల్ చేసింది. అయితే పెళ్లి చెడగొట్టడానికి వచ్చావా? అంటూ వరుడి బంధువులు విచక్షణ మరిచి ఆమెను జుట్టుపట్టుకుని రోడ్డు మీదికి ఈడ్చి పడేశారు. ఈ ఘటనలో ఖమ్మం బైపాస్‌ రోడ్డులోని కృష్ణా ఫంక్షన్ హాలులో చోటుచేసుకుంది. యువతి కథనం మేరకు.. మహబూబాబాద్ జిల్లా గార్ల మండలానికి చెందిన రజిని, శ్రీధర్ కొన్నాళ్ల నుంచి ప్రేమించుకుంటున్నారు. ఈ క్రమంలోనే పెళ్లి చేసుకుంటానని నమ్మించిన శ్రీధర్ ఆమెను లైంగికంగా వాడుకున్నాడు. తీరా ఆమెకు తెలియకుండా మరో యువతితో పెళ్లికి సిద్ధమయ్యాడు.
శుక్రవారం ఉదయం శ్రీధర్ పెళ్లి చేసుకుంటున్నాడని తెలుసుకున్న రజినీ నేరుగా ఖమ్మం పట్టణంలోని ఫంక్షన్ హాల్‌కి వచ్చి గొడవ చేసింది. తనను కాదని మరొకరిని పెళ్లి ఎలా చేసుకుంటావని ప్రియుడిని నిలదీసి వివాహం ఆపేందుకు ప్రయత్నించింది. దీంతో ఆగ్రహించిన వరుడి బంధువులు ఆమెపై దాడి చేసి జుట్టు పట్టుకుని రోడ్డు మీదికి లాగేశారు. తనకు న్యాయం చేయాలని ఆమె వేడుకున్నా ఎవరూ కనికరించలేదని, తనపై దాడికి పాల్పడ్డారని ఆమె ఆవేదన వ్యక్తం చేస్తోంది. ఈ విషయంలో తనకు న్యాయం చేయాలని యువతి పోలీసులను వేడుకుంది.