అసోంలోని శివసాగర్ జిల్లా దెమోలో సోమవారం ఉదయం ట్రావెలర్ బస్సు టెంపో వాహనాన్ని ఢీకొని 10 మంది మృతి చెందారు. ప్రమాదంలో మరికొంత మంది ప్రయాణికులు తీవ్రంగా గాయపడ్డారు. వీరిలో పలువురి పరిస్థితి విషమంగా ఉంది. ప్రమాదం సమాచారం అందిన వెంటనే అధికారులు హుటాహుటిన ఘటనా స్థలికి చేరుకొని సహాయ చర్యలు ప్రారంభించారు.
కొంత మంది పర్యాటకులతో జాతీయ రహదారి ఎన్‌హెచ్ 37పై వెళ్తున్న టెంపో ట్రావెలర్.. ఎదురుగా వస్తున్న ట్రావెల్ బస్సును ఢీకొట్టడంతో ఈ ప్రమాదం చోటుచేసుకుంది. అతివేగం, వాతావరణ పరిస్థితులే ప్రమాదానికి కారణమని అధికారులు చెబుతున్నారు.ప్రమాద తీవ్రతకు టెంపో వాహనం నుజ్జునుజ్జయింది. రహదారి రక్తసిక్తంగా మారింది.
వాహనంలో ఇరుక్కున్న మృతదేహాలను అధికారులు గంటల తరబడి శ్రమించి బయటకు తీసుకొచ్చారు. ప్రమాదం కారణంగా ట్రాఫిక్‌ నిలిచిపోయింది.ప్రమాదంలో గాయపడిన వారిని దిబ్రూగర్‌లోని అసోం మెడికల్ కాలేజీ ఆస్పత్రికి తరలించి చికిత్స అందిస్తున్నారు.