ఓ వ్యక్తి ట్రిపుల్ తలాక్ చెప్పి ఖతార్‌లోని ఓ హోటల్‌లో తన భార్య బిడ్డను విడిచిపెట్టిన సంఘటన మధ్యప్రదేశ్‌లోని భోపాల్‌లో చోటు చేసుకుంది.
ఒంటరిగా భోపాల్‌కు తిరిగి వచ్చిన తర్వాత, 32 ఏళ్ల మహిళ తన భర్త, మధ్యప్రదేశ్‌లోని కోహెఫిజా జిల్లాకు చెందిన ఎండీ రెహాన్‌పై కోహ్-ఎ-ఫిజా పోలీసులకు ఫిర్యాదు చేసింది. మహిళ ఫిర్యాదు ఆధారంగా, పోలీసులు ఆ వ్యక్తిపై క్రూరత్వం మరియు ట్రిపుల్ తలాక్ ఉచ్చారణ ఆరోపణలపై IPC మరియు ముస్లిం మహిళల (వివాహంపై హక్కుల పరిరక్షణ) చట్టం 2019 కింద కేసు నమోదు చేశారు.
ఆ మహిళ తల్లిదండ్రుల వద్దే ఉంటోంది. తన భర్త తన బ్యాంకు ఖాతా నుంచి రూ.4.5 లక్షలు కూడా తీసుకున్నాడని ఆరోపించింది. పోలీసులు తెలిపిన వివరాల ప్రకారం.. దంపతులకు 2010లో వివాహం కాగా, వీరికి ఒక కుమారుడు ఉన్నాడు. నిందితుడు దుబాయ్‌లో పనిచేస్తున్నాడు.
పెళ్లయిన కొంత కాలం తర్వాత తన భర్త మరో మహిళతో వివాహేతర సంబంధం కొనసాగిస్తున్నట్లు గుర్తించినట్లు ఆ మహిళ తన ఫిర్యాదులో పేర్కొంది. ఆమె అతనిని ఎదుర్కొన్నప్పుడు, అతను ఆమెను వేధించడం ప్రారంభించాడు అని తెలిపింది.
తన భర్త తనను భారత్‌కు తీసుకెళ్తాననే నెపంతో ఖతార్‌లోని ఓ హోటల్‌కు తీసుకెళ్లాడని, తనను, తమ బిడ్డను హోటల్‌లో ఒంటరిగా వదిలి వెళ్లే ముందు ట్రిపుల్ తలాక్ చెప్పాడని మహిళ ఆరోపించింది. ఆ మహిళ తనంతట తానుగా భోపాల్‌కు తిరిగి వచ్చి తల్లిదండ్రులతో కలిసి జీవించడం ప్రారంభించింది.
ఆమె ఫిర్యాదుపై కోహెఫిజా పోలీసులు విచారణ చేపట్టారు.
