క్రిష్‌ ఎన్టీఆర్‌ బయోపిక్‌ను ప్రత్యేక శ్రద్దతో తెరకెక్కిస్తున్నాడు. ఈ చిత్రాన్ని రెండు పార్టులుగా జనవరిలో విడుదల చేయనున్నారు. ఈ చిత్రంలో ఎన్టీఆర్‌గా బాలయ్య నటిస్తున్నాడు. ఎన్టీఆర్‌ జీవితంలో కీలక మలుపులు ఉన్న నేపథ్యంలో బాలయ్య తన వియ్యంకుడు చంద్రబాబు కోసం కొన్నింటిని మార్చే అవకాశం ఉంది. చంద్రబాబు నాయుడును పాజిటివ్‌గా మాత్రమే చూపించనున్నారు అనే టాక్‌ మొదటి నుండి షికారు చేస్తోంది. అయితే ఎన్టీఆర్‌ను వెన్నుపోటు పొడిచి చంద్రబాబు తన రాజకీయ ప్రస్థానాన్ని ప్రారంభించాడు అని ఎన్టీఆర్‌ వర్గం అభిప్రాయపడతారు. అయితే ఇలాంటి కోణంలో చంద్రబాబును చూపించకుండా కేవలం ‘ఎన్టీఆర్‌’లో ఎన్టీఆర్‌, చంద్రబాబుల సఖ్యతనే చూపించనున్నట్టు తెలుస్తోంది.
ఎన్టీఆర్‌ మనసావాచా ఇష్టపడి లక్ష్మిపార్వతిని రెండో వివాహం చేసుకున్నాడు. ఎన్టీఆర్‌ ఈమెను పెళ్లి చేసుకోవడం నందమూరి కుటుంబానికి నచ్చలేదు. దాంతో తన కొడుకులు, కూతుళ్ల నుండి వ్యతిరేకత వచ్చింది అనేది అందరికి తెలిసిన విషయమే. కానీ ఇవేవి కూడా ‘ఎన్టీఆర్‌’ బయోపిక్‌ చూపించబోరు అంటూ వార్తలు వచ్చాయి. కానీ లక్ష్మిపార్వతి పాత్ర కొంత కూడా లేకుంటే విమర్శలు అధికమయ్యే ఛాన్స్‌ ఉంది కాబట్టి లక్ష్మిపార్వతి ఎన్టీఆర్‌కు ఎలా పరిచయం అయింది, ఆయన జీవితంలోకి ఎలా ప్రవేశించింది అనే విషయాలను కొన్ని చూపించాలని చిత్ర యూనిట్‌ ప్లాన్‌ చేస్తున్నారు. అందుకుగాను లక్ష్మిపార్వతి పాత్రకు సీనియర్‌ హీరోయిన్‌ ఆమనిని ఎంపిక చేసినట్టు తెలుస్తోంది. గతంలో బాలయ్య, ఆమనిలు జంటగా నటించారు. చాలా ఏళ్ల తర్వాత బాలయ్య, ఆమనిలు కలిసి నటించనున్నారు.
