జింబాబ్వే సీనియర్ క్రికెటర్ బ్రెండన్ టేలర్ ఇంటర్నేషనల్ క్రికెట్‌కి గుడ్ బై చెప్పేశాడు. 2004లో అంతర్జాతీయ క్రికెట్‌లోకి ఎంట్రీ ఇచ్చిన బ్రెండన్ టేలర్.. కెరీర్‌లో 34 టెస్టులు, 204 వన్డేలు, 44 టీ20 మ్యాచ్‌లు ఆడాడు. జింబాబ్వే క్రికెట్‌కి వన్నె తెచ్చిన ఆటగాడిగా గుర్తింపు పొందిన బ్రెండన్ టేలర్.. 18 ఏళ్ల వయసులోనే ఇంటర్నేషనల్ క్రికెట్‌లోకి ఎంట్రీ ఇవ్వడం గమనార్హం.
జింబాబ్వే జట్టులోకి తొలుత బ్యాట్స్‌మెన్‌గా వచ్చిన బ్రెండన్ టేలర్.. ఆ తర్వాత ఆఫ్ స్పిన్నర్ కూడా రాణించి పొదుపుగా బౌలింగ్ చేయడంతో పాటు వికెట్లు కూడా పడగొట్టాడు. మధ్యలో రెగ్యులర్ వికెట్ కీపర్ తైబు జట్టుకి దూరమవగా.. కొన్నాళ్లపాటు కీపర్‌గానూ బ్రెండన్ టేలర్ బాధ్యతలు నిర్వర్తించాడు. 2004లో జట్టులోకి ఎంట్రీ ఇచ్చినా.. 2009 వరకూ బ్రెండన్ టేలర్ వన్డే సెంచరీ చేయలేకపోయాడు.
2009లో బంగ్లాదేశ్‌తో జరిగిన వన్డేలో బ్రెండన్ టేలర్ 118 పరుగులు చేసినా.. ఆ మ్యాచ్‌లో జింబాబ్వే ఓడిపోయింది. కానీ.. ఆ తర్వాత దక్షిణాఫ్రికా, శ్రీలంకపై కూడా సెంచరీలు సాధించిన టేలర్.. మొత్తంగా వన్డేల్లో 11 శతకాలు నమోదు చేశాడు. అతని ఇన్నింగ్స్‌ల్లో 106 సిక్సర్లు కూడా ఉండటం విశేషం. అలానే టెస్టుల్లో ఆరు సెంచరీలు బాదిన టేలర్ వయసు ఇప్పుడు 35 ఏళ్లు.