ఈరోజుల్లో శాఖాహారులు కూడా గుడ్డు తినడం కామన్‌గా మారింది. గుడ్డులో అధిక పోషకాలు లభించడంతో పాటు విటమిన్ ఎ, సి, డి, ఇంకా ప్రొటీన్స్‌ పుష్కలంగా ఉండటంతో అందరూ గుడ్డు తింటున్నారు. గరిష్ట ప్రయోజనాల కోసం ప్రతిరోజూ కనీసం ఒకటి నుంచి రెండు గుడ్లు తీసుకోవాలని నిపుణులు సలహా ఇస్తారు. కానీ ఒక అధ్యయనం ప్రకారం.. కోడిగుడ్లు అధికంగా తినడం మధుమేహాన్ని ప్రేరేపిస్తుందని తేలింది. రోజుకు ఒకటి లేదా అంతకంటే ఎక్కువ గుడ్లు తినేవారిలో మధుమేహం వచ్చే ప్రమాదం 60 శాతం పెరిగినట్లు సర్వే ద్వారా స్పష్టమైంది.
అయితే ఈ సమస్య పురుషుల కంటే మహిళల్లో ఎక్కువగా కనిపిస్తున్నట్లు పరిశోధకులు తేల్చారు. ఖతార్ విశ్వవిద్యాలయం భాగస్వామ్యంతో చైనా మెడికల్ యూనివర్శిటీ ఈ అధ్యయనం నిర్వహించింది. ఈ పరిశోధన ప్రకారం.. చాలారోజులు రోజుకు రెండు కంటే ఎక్కువ గుడ్లు తినేవారిలో మధుమేహం వచ్చే ప్రమాదం సుమారు 25 శాతం పెంచింది. అంతేకాకుండా క్రమం తప్పకుండా 50 గ్రాముల కంటే ఎక్కువ గుడ్లు తినే పెద్దలలో మధుమేహం వచ్చే ప్రమాదం 60 శాతం పెరిగిందని కనుగొన్నారు. ఈ పరిశోధనలో సగటున 50 ఏళ్ల వయసు ఉన్న 8,545 మంది చైనీస్ పెద్దలు, చైనా హెల్త్ అండ్ న్యూట్రిషన్లు పాల్గొన్నారు.
ఎక్కువగా కోడిగుడ్లు తీసుకోవడం అనేది టైప్ 2 మధుమేహం రావడానికి దోహదపడుతుందని, కాబట్టి వ్యాధి పెరుగుతున్న ప్రాబల్యాన్ని ప్రభావితం చేసే ఆహార కారకాల శ్రేణిని అర్థం చేసుకోవడం చాలా ముఖ్యమని పరిశోధకులు చెప్పారు. గత కొన్ని దశాబ్దాలుగా చైనాలో చాలా మంది ప్రజలు ధాన్యాలు, కూరగాయలతో కూడిన సాంప్రదాయ ఆహారం నుంచి ఎక్కువ మొత్తంలో మాంసం, స్నాక్స్, అధిక శక్తిని ఇచ్చే ప్రాసెస్ చేయబడిన ఆహారాన్ని తీసుకోవడం జరుగుతోంది. ఇది చైనాలో ఇటీవల కాలంలో వచ్చిన గణనీయమైన పోషకాహార మార్పు అని వారు తెలిపారు.
చైనాలో ఇటీవల కాలంలో గుడ్డు వినియోగం అధికంగా పెరిగింది. 1991 నుండి 2009 వరకు చైనాలో గుడ్లు తినే వారి సంఖ్య దాదాపు రెండింతలు పెరిగిందని బ్రిటిష్ జర్నల్ ఆఫ్ న్యూట్రిషన్‌లో ప్రచురించారు. గుడ్లు తినడం, మధుమేహం రావడం మధ్య అనుబంధం తరచుగా చర్చనీయాంశంగా మారినా… ఈ అధ్యయనం ప్రజల దీర్ఘకాల వయసును అంచనా వేయడానికి లక్ష్యంగా పెట్టుకుని పరిశోధనలు నిర్వహించారు. గుడ్డు అధికంగా వినియోగించడం ద్వారా మధుమేహం పెరగడం అనే సమస్య బాధితుల రక్తంలో గ్లూకోజ్ ద్వారా నిర్ణయించబడుతుంది.
వాస్తవానికి గుడ్డులోని పసుపు భాగంలో విటమిన్ ఎ, డి, ఈ, కె, ఒమేగా-3 కొవ్వులు ఉంటాయి. ఫోలేట్, విటమిన్ B12 గుడ్డులోని తెల్ల భాగంతో పోలిస్తే పసుపు భాగంలో ఎక్కువగా ఉంటాయి. అలాగే గుడ్డు పచ్చసొనలో ఐరన్, రైబోఫ్లావిన్ కూడా చాలా ఎక్కువగా ఉంటుంది. అయితే, ఆరోగ్యాన్ని దృష్టిలో ఉంచుకుని మీరు ఏ డైట్ తీసుకోవాలనుకున్నా.. మీరు ఖచ్చితంగా ఒకసారి డైటీషియన్‌ సలహా తీసుకోవాలి. అలాగే క్యాలరీల విషయంలోనూ చాలామంది పచ్చసొనను తినడానికి ఇష్టపడరు. గుడ్డులో దాదాపు 72 క్యాలరీలు ఉంటాయి. ఇందులో 55 కేలరీలు పచ్చసొనవి కాగా.. తెలుపు భాగంలో 17 క్యాలరీలు ఉంటాయి. అందువల్ల కేలరీల సంఖ్యను తగ్గించడంలో భాగంగా కొంతమంది పసుపు భాగాన్ని తినరు.
మరోవైపు గుడ్లు ఎక్కువగా తినడం వల్ల శరీరంలో చెడు కొలెస్ట్రాల్ స్థాయి పెరుగుతుంది. ఎందుకంటే గుడ్డు మధ్య భాగంలో ఉండే పసుపు పచ్చ పదార్థంలో కొలెస్ట్రరాల్ ఎక్కువగా ఉంటుంది. ఒక గుడ్డు పచ్చసొనలో దాదాపు 200 mg కొలెస్ట్రాల్ ఉంటుంది. ప్రతిరోజూ 300 mg కంటే ఎక్కువ కొలెస్ట్రరాల్ తీసుకోవడం ఆరోగ్యానికి మంచిది కాదు. అయితే ఒక వ్యక్తి రోజుకు ఎన్ని గుడ్లు తినాలి అనే దానిపై స్పష్టత లేదు. ఎందుకంటే ప్రతి ఒక్కరి ఆరోగ్యం భిన్నంగా ఉంటుంది కాబట్టి ఇది వ్యక్తిపై ఆధారపడి ఉంటుంది.
ఇటీవలి అధ్యయనంలో సగటు ఆరోగ్యం ఉన్న వ్యక్తి వారానికి 7 గుడ్లు తినవచ్చు అయితే మీరు ఏదైనా వ్యాధి, ఇతర ఆరోగ్య సంబంధిత సమస్యలు లేకుంటే రోజుకు 3 గుడ్లు తినవచ్చు. గుడ్లు పుష్టికరమైనవే కానీ గుడ్లు ఎన్ని కావాలంటే అన్ని తినాలని కాదు. వేసవిలో గుడ్లు ఎక్కువగా తినడం వల్ల శరీరంలో వేడి పెరుగుతుంది. దీని వల్ల ముఖ్యంగా పిల్లల్లో డయేరియా సమస్య కూడా రావచ్చు, కాబట్టి మనం గుడ్లు తినడం అదుపులో ఉంచుకోవాలి. కానీ గుడ్లలో ప్రోటీన్, విటమిన్ బి12, విటమిన్ డి, ఇతర యాంటీ ఆక్సైడ్లు వంటి అనేక పోషకాలు ఉంటాయి. ఇవి మీ ఆరోగ్యానికి చాలా మేలు చేస్తాయనడంలో ఎటువంటి సందేహం లేదు.
చాలామందికి గుడ్డు తింటే కొవ్వు పెరుగుతుందని అనుకుంటారు. దీంతో గుడ్డు తినడం మానేస్తారు. కానీ అది అపోహ మాత్రమే. వాస్తవానికి గుడ్డులోని తెల్లసొనలో ఆల్బుమిన్, బోలెడన్ని మాంసకృత్తులు ఉంటాయి. దాంట్లో కొలెస్ట్రరాల్ కారకాలు ఏమీ ఉండవు. పచ్చసొనలోనే కొలెస్ట్రరాల్ ఉంటుంది గానీ అదొక్కటే కాదు. అందులో విటమిన్-ఎ, ఇతర కొవ్వు ఆమ్లాల వంటివి ఎన్నో ఉంటాయి. కాబట్టి అందరికీ గుడ్డు మంచిది. కాకపోతే రక్తంలో కొలెస్ట్రరాల్ స్థాయిలు ఎక్కువగా ఉన్నవాళ్లకు, గుండె జబ్బులు, హైబీపీ వంటివి ఉన్నవారికి ఈ పచ్చసొనతో కొంత ఇబ్బంది ఉండొచ్చు.
కాబట్టి అలాంటి వారు పచ్చసొనని తీసేసి తెల్లదాన్ని తింటే సరిపోతుంది.ఏ సమస్య లేని సాధారణ ఆరోగ్యవంతులు గుడ్డును నిశ్చితంగా తినొచ్చు. రోజుకు ఒకటి తింటే మేలే చేస్తుంది. గుడ్డుని తినడం వల్ల కండరాలు దృఢంగా అవుతాయి. గర్బవతులకు గుడ్డు చాలా ఆరోగ్యకరం. గుడ్డులో ఉండే ఫోలిక్ యాసిడ్, ఇనుము పుట్టబోయే బిడ్డ ఎదుగుదలకు ఉపయోగపడుతుంది. రోజుకి ఒక గుడ్డును ఆహారంలో తీసుకుంటే శరీరానికి మేలు చేసే హెచ్‌డీఎల్ కొలెస్ట్రరాల్ పెరిగి చెడు కొలెస్ట్రరాల్ తగ్గుతుంది.