అధికార పార్టీలో ట్రబుల్ షూటర్ అంటే హరీష్ రావు. సీఎం కేసీఆర్‌కు స్వయాన మేనల్లుడు. తెలంగాణ ఉద్యమ సమయం నుంచి కేసీఆర్ కు వెన్నంటే ఉన్న హరీష్ తొలివిడత ప్రభుత్వంలో కీలక పాత్ర పోషించారు. పార్టీకి ఎప్పుడు ఎక్కడ ఎలాంటి కష్టం వచ్చినా … వెంటనే రంగంలోకి దిగి పార్టీని నిలబెట్టారు. ఎక్కడ పార్టీకి పాలన పరంగా సవాళ్లు ఎదురైనా అక్కడ హరీష్ రావు తన స్ట్రాటజీ వర్తిస్తారు. రాష్ట్రంలో ఎలాంటి కీలక పరిణామం చోటు చేసుకున్నా రంగంలోకి దిగి పరిస్థితులు చక్కబెట్టేస్తారు.
గత అసెంబ్లీ ఎన్నికల సమయంలో 26 మంది కాంగ్రెస్ పార్టీకి చెందిన కీలక నేతల నియోజకవర్గాల్లో హరీష్ రావు ప్లాన్ విస్తృతంగా ప్రచారం నిర్వహించారు. ఈ 26 మంది కీలక కాంగ్రెస్ నేతలు అసెంబ్లీలో అడుగు పెట్టకుండా హరీష్ రావు ప్లాన్స్ వర్కౌటయ్యాయి. ఈ ఎన్నికల సమయంలో కేసీఆర్ ప్రత్యేకంగా హరీష్ రావు ప్రచారం కోసం ఒక్క హెలికాప్టర్ ను కేటాయించారు.
2014 ఎన్నికల్లో గజ్వేల్ అసెంబ్లీ స్థానంలో కేసీఆర్ ఎమ్మెల్యేగా గెలుపొండంలో కూడ హరీష్ రావు కీలకపాత్ర పోషించారు.అందుకే హరీష్ రావు వెన్నంటే ఉంటే కేసీఆర్‌కు కొండంత అండగా ఫీల్ అవుతారు. సిద్దిపేట నుంచి వరుసగా ఆరుసార్లు ఎమ్మెల్యేగా విజయం సాధించారు హరీష్ రావు. ఉమ్మడి ఆంధ్రప్రదేశ్‌లో ఒకసారి తెలంగాణలో రెండు సార్లు మొత్తం మూడు సార్లు మంత్రిగా హరీశ్‌రావు ప్రమాణ స్వీకారం చేశారు.
అలాంటి హరీష్ రావుకు దుబ్బాకలో టీఆర్ఎస్ ఓటమి జీర్ణించుకోలేని విషయం. ఆయన దత్తత తీసుకున్న గ్రామంలో కూడా టీఆర్ఎస్‌కు ఓట్లు రాలేదు. దీంతో మంత్రి సైతం షాక్ అయ్యారు. అయితే ఈ ఓటమిపై పలువురు నేతలు, రాజకీయ విశ్లేషకులు రకరకాలుగా చర్చించుకుంటున్నారు.