టాలీవుడ్ డ్రగ్స్ కేసులో ఈడీ ప్రదర్శిస్తున్న దూకుడు అందరికీ తెలిసిందే. ఓ వైపు రాజకీయ కామెంట్ల దాడి పెరుగుతూనే ఉంది. మరో వైపు టాలీవుడ్ సెలెబ్రిటీలను ఈడీ వరుసగా ప్రశ్నిస్తూనే ఉంది. ఇక ఈ క్రమంలో నేడు చివరగా హీరో తరుణ్ ఈడీ ఎదుట హాజరయ్యాడు. ఈ క్రమంలో ఈడీ ప్రశ్నల వర్షం కురిపించినట్టు తెలుస్తోంది.
ఈడీ విచారణకు బుధవారం ఉదయం తరుణ్ హాజరైన సంగతి తెలిసిందే. సుమారు 7 గంటలపాటు ఎన్‌ఫోర్స్‌మెంట్‌ డైరెక్టరేట్‌ (ఈడీ) అధికారులు ఆయన్ను ప్రశ్నించినట్టు తెలుస్తోంది. మనీలాండరింగ్‌ కోణంలో తరుణ్ బ్యాంక్ ఖాతాలను పరిశీలించారని సమాచారం. అనుమానాస్పద లావాదేవీల గురించి ఆరా తీశారని తెలుస్తోంది. డ్రగ్స్ విక్రేత కెల్విన్‌తో ఉన్న సంబంధాల గురించి తరుణ్‌ను ఈడీ ప్రశ్నించినట్టు సమాచారం.
మొత్తంగా మనీ లాండరింగ్‌ కోణంలో 12 మంది సినీ ప్రముఖులకు ఈడీ నోటీసులిచ్చింది. అందులో భాగంగా ఆగస్ట్ నెల చివరి నుంచి నేటి వరకు ఈడీ విచారణను చేపట్టింది. పూరి జగన్నాథ్ నుంచి తరుణ్ వరకు అందరినీ కూడా పిలిచి విచారించింది. పూరీ జగన్నాథ్, రానా, ఛార్మి, నవదీప్, రకుల్‌ప్రీత్‌ సింగ్‌, రవితేజ, నందు, నవదీప్, తరుణ్ ఇలా అందరినీ ఈడీ విచారింది.
అయితే ఎఫ్ఎస్ఎల్ మాత్రం వీరికి క్లీన్ చీట్ ఇచ్చింది. 2017లో సేకరించిన శాంపిల్స్‌లో ఎటువంటి డ్రగ్స్ ఆనవాళ్లు లేవని తేల్చి చెప్పింది. పూరి జగన్నాథ్, తరుణ్ వంటి వారి దగ్గరి నుంచి తీసుకున్న శాంపిల్స్‌లో డ్రగ్స్ వాడినట్టు ఎక్కడా నిర్దారణ కాలేదని చెప్పడంతో కేసు కొత్త మలుపు తిరిగింది. ఇక ఇప్పుడు ఈడీ విచారణ సైతం ముగిసింది. మున్ముందు ఈ కేసులో ఏం జరుగుతుందో చూడాలి.