తెలుగు బిగ్బాస్ సీజన్ 2 ప్రారంభం అయ్యి మూడు వారాలు అయ్యింది. మొదటి రెండు వారాల్లో సంజన మరియు నూతన్ నాయుడు ఎలిమినేట్ అయిన విషయం తెల్సిందే. వీరిద్దరు కూడా సామాన్యులే అవ్వడం, వీరిద్దరికి ప్రేక్షకులతో పెద్దగా పరిచయం లేక పోవడం వల్ల బిగ్బాస్ ఇంటి నుండి వీరు వెళ్లి పోయారు. ఇక మూడవ వారం ఎలిమినేషన్ కార్యక్రమం తాజాగా జరిగింది. ఈ ఎలిమినేషన్ జాబితాలో కిరీటి మరియు గణేష్లతో పాటు తేజస్వి కూడా ఉన్న విషయం తెల్సిందే. తేజస్వి ఎలిమినేషన్లో ఉన్న నేపథ్యంలో ఆమె ట్విట్టర్ మరియు ఇతర సోషల్ మీడియా అకౌంట్స్ ద్వారా తనకు ఓటు వేయాల్సిందిగా పోస్టర్లు వస్తున్నాయి.
తేజస్వి బిగ్బాస్ ఇంట్లో ఉండగా ఆమెకు మద్దతుగా ఎవరు ఇలా ప్రచారం చేస్తున్నారు అంటూ సినీ వర్గాల్లో కూడా చర్చ జరుగుతుంది. ఈ సమయంలోనే అందుతున్న సమాచారం ప్రకారం బిగ్బాస్ సీజన్ 2లో తాను ఉంటాను అని తెలియగానే ఒక సంస్థకు తన సోషల్ మీడియా అకౌంట్స్ అప్పగించి, తాను ఎలిమినేషన్స్లో ఉన్న సమయంలో తనకు మద్దతుగా ప్రచారం చేయాల్సిందిగా చెప్పింది. తన అకౌంట్స్లో ప్రతి రోజు ఓటు వేయాల్సిందిగా పోస్టర్స్ను పోస్ట్ చేయాలని ఒప్పందం కుదుర్చుకుంది. ఈ నేపథ్యంలోనే తేజస్వికి సంబంధించిన ప్రమోషన్స్ను వారు చేస్తున్నట్లుగా తెలుస్తోంది. ఇంకా పలు సోషల్ మీడియా ద్వారా కూడా తేజస్వికి వారు ఓట్లు వేయిస్తున్నట్లుగా తెలుస్తోంది. మొత్తానికి తేజస్వి చివరి వరకు ఉండేందుకు పెద్ద ప్లాన్ వేసిందని సినీ వర్గాల వారు అంటున్నారు.
