ప్రేమ ఎప్పుడు, ఎక్కడ, ఎందుకు, ఎవరి మీద పుడుతుందో తెలియందంటారు. కానీ నేటి సమాజం చూస్తుంటే అది ప్రేమ అనాలో కామం అనాలో అర్ధం కావడం లేదు గత ఏడాది కాలం నుండి నమోదవుతున్న వివాహేతర సంబంధాల కేసులు చూస్తే ఈ అనుమానం కలుగక మానదు. తాజాగా తమ పొరుగు ఇంట్లో ఉన్న ఓ చోటా రాజకీయ నేతతో అక్రమ సంబంధం పెట్టుకున్న ఓ వ్యాపారి భార్య, అతని కలిసి బతికేందుకు ఇంట్లోని 150 సవర్ల బంగారు నగలను తీసుకుని పారిపోయిన ఘటన తమిళనాడులోని కన్యాకుమారి సమీపంలో సంచలనం కలిగిస్తోంది. మార్తాండం పోలీసులు వెల్లడించిన సమాచారం ప్రకారం, మార్తాండం ప్రాంతానికి చెందిన ఓ వ్యాపారి (50) ఫైనాన్స్ కంపెనీని నిర్వహిస్తుండగా, అతనికి భార్య (40), ముగ్గురు కుమార్తెలు, కుమారుడు ఉన్నారు.
వారింటి పక్కనే వివాహమై భార్యా, పిల్లలున్న ఓ రాజకీయ పార్టీ ప్రముఖుడు ఉంటున్నాడు. వ్యాపారికీ నాయకుడికీ మధ్యా వ్యాపారపరమైన లావాదేవీలున్నాయి దీంతో వారు తరచూ కలుసుకునేవాళ్లు. ఈ క్రమంలో వ్యాపారి భార్యతో రాజకీయ నేతకి వివాహేతర సంబంధం ఏర్పడింది. ఈ విషయం తెలిసిన వ్యాపారి వారిని మందలించడంతో బుధవారం నాడు తన ఇంట్లోని 150 సవర్ల బంగారం నగలతో ఆమె అదృశ్యం అయింది. తన ప్రియుడితో కలసి ఆమె పారిపోయినట్టు విచారణలో వెల్లడికాగా, వారిద్దరి కోసం పోలీసులు గాలిస్తున్నారు.
