సామూహిక నిమజ్జనాన్ని తిలకించేందుకు వచ్చిన యువతులను సెల్‌ఫోన్‌ ద్వారా వీడియో రికార్డింగ్‌ చేసిన ఓ జూనియర్ ఆర్టిస్ట్ కు కోర్టు 27 రోజుల జైలు శిక్ష విధించినట్లు సమాచారం. గత నెల 23న సామూహిక గణేష్‌ నిమజ్జనం జరిగింది. ఈ సందర్భంగా ఎలాంటి అవాంఛనీయ ఘటనలకు తావు లేకుండా పోలీసులు అనేక జాగ్రత్తలు తీసుకుంటున్నారు. నగర పోలీసు కమిషనర్‌ అంజనీ కుమార్‌ ఆదేశాల మేరకు ముందు జాగ్రత్త చర్యల్లో భాగంగా షీ–టీమ్స్‌ను రంగంలోకి దింపారు.
ఈవ్‌ టీజర్లకు చెక్‌ పెట్టేందుకు 100 షీ–టీమ్ బృందాలను వివిధ ప్రాంతాల్లో మోహరించారు. ఆ సమయంలో ట్యాంక్‌బండ్‌ పై యువతులను వెకిలి చేష్టలతో వేధిస్తున్న మీర్‌పేటకు చెందిన జూనియర్ ఆర్టిస్ట్ పి.కృష్ణను షీ-టీమ్ బృందాలు పట్టుకుని కోర్టులో హాజరుపరిచాయి. దీంతో సదరు ఆర్టిస్ట్ కి న్యాయస్థానం 27 రోజుల జైలు శిక్ష అలాగే రెండు రోజుల పాటు సామాజిక సేవ చేసేలా శిక్షతో పాటు రూ.100 జరిమానా విధించింది.
