కూటమి లెక్కలు తేలాయా…లేదా….?

తెలంగాణలో నామినేషన్లకు గడువు సమీపిస్తున్న వేళ కూటమిలో సీట్ల సర్దుబాటు ప్రక్రియ వేగం పుంజుకుంది. ఢిల్లీలోని సోనియా గాంధీ నివాసంతో కాంగ్రెస్ నేతలు సమావేశమయ్యారు. ఎంపికపై సుమారు 2 గంటల పాటు చర్చించారు. అనంతరం టీపీసీసీ అధ్యక్షుడు ఉత్తమ్ కుమార్ రెడ్డి, తెలంగాణ కాంగ్రెస్ వ్యవహారాల ఇంఛార్జ్ కుంతియా మీడియాతో మాట్లాడుతూ కాంగ్రెస్ 95 స్థానాల్లో పోటీ చేస్తుందని, మిగిలిన 24 స్థానాలు మిత్రపక్షాలకు కేటాయించామని ఉత్తమ్ తెలిపారు. 62 స్థానాల్లో అభ్యర్థుల ఎంపికపై చర్చ జరిగిందని కుంతియా తెలిపారు. వాటిలో 57 స్థానాల్లో అభ్యర్థుల ఎంపిక పూర్తైనట్లు చెప్పారు. నవంబర్ 8 రాత్రి అభ్యర్థుల జాబితా ప్రకటిస్తామని, 9న ఉదయం వివరాలు వెల్లడిస్తామని కుంతియా తెలిపారు. ఎంపిక ప్రక్రియ వీలైనంత త్వరగా పూర్తి చేయడానికి ప్రయత్నం చేస్తున్నట్లు చెప్పారు.

కాంగ్రెస్ పార్టీ 95 స్థానాల్లో పోటీ చేస్తుందని ఉత్తమ్ తెలిపారు. టీడీపీతో 14 సీట్లకు అంగీకారం కుదిరిందని ఆయన చెప్పారు. టీజేఎస్, సీపీఐతో సీట్ల సర్దుబాటుపై చర్చలు కొనసాగుతున్నాయని, త్వరలో ఇవి కూడా ఓ కొలిక్కి వస్తాయని ఉత్తమ్‌ చెప్పారు. టీజేఎస్‌కు 6, సీపీఐకి 4 సీట్లు కేటాయించే అవకాశం ఉందని తెలుస్తోంది. కూటమిలోని పార్టీలతో చర్చలు పూర్తయ్యాకే అభ్యర్థుల ప్రకటన ఉంటుందని కుంతియా తెలిపారు. కూటమిలో తొలి నుంచి టీజేఎస్ విషయంలోనే సీట్ల సర్దుబాటు ఓ కొలిక్కి రావడంలేదు. ఆ పార్టీ తొలుత 20 సీట్లు డిమాండ్ చేసింది. చివరికి గరిష్టంగా 8 సీట్లు ఇస్తారని భావించినా.. 6 లేదా 7 సీట్లకే పరిమితం అయ్యేలా కనిపిస్తోంది. మరోవైపు కోదండరాం బుధవారం రాత్రి చేసిన వ్యాఖ్యలు కూటమిలో కలకలం రేపాయి. ఇప్పటిదాకా ఇంకా కూటమి ఏర్పాటు కాలేదని, అందుకు సంబంధించిన చర్చలు మాత్రమే జరిగాయని కోదండరాం అన్నారు. సీట్ల సర్దుబాటు ఓ కొలిక్కి వస్తేనే కూటమి ఏర్పాటు పూర్తైనట్లని ఆయన వ్యాఖ్యానించారు.

తమకు తగిన ప్రాధాన్యం దక్కలేదని భావిస్తే ఒంటరిగా బరిలోకి దిగడానికైనా సిద్ధమేనని ఆయన మిత్ర పక్షాలకు హెచ్చరికలు పంపారు. మరోవైపు సీట్ల కేటాయింపు అంశాన్ని త్వరగా తేల్చాలని కూడా ఒత్తిడి పెంచుతున్నట్లు తెలుస్తోంది. కాంగ్రెస్‌ కేంద్ర ఎన్నికల కమిటీ నవంబర్ 8న మరోసారి సమావేశమై అభ్యర్థుల జాబితాకు ఆమోదముద్ర వేసే అవకాశముంది. గురువారం జరగాల్సిన స్క్రీనింగ్ కమిటీ భేటీ కూడా 5కు వాయిదా పడింది. కూటమిలోనూ సీట్ల సర్దుబాటు కొలిక్కి వస్తే అన్ని పార్టీలు కలిసే అభ్యర్థుల జాబితాను విడుదల చేసే అంశాన్ని కూడా పరిశీలిస్తున్నారు.