ఎప్పుడూ నవ్వుతూ నవ్విస్తూ ఉండే బాబా భాస్కర్ ఏడ్చేశారు. ఉద్వేగం తట్టుకోలేక కంటతడి పెట్టుకున్నారు. ఇదంతా నిన్నటి టాస్క్‌ల మహిమ. ఇంటిలో తనవాళ్లు అనుకునేవారే తనపై నిందలు వేయడం, మాటలు అనడం వంటి విషయాలను బాబా భాస్కర్ జీర్ణించుకోలేకపోయారు. అందుకే, స్మోకింగ్ రూంలో కూర్చొని ఏడ్చేశారు. బాబాను వరుణ్ ఓదార్చారు. ఇదంతా మన టీవీ ద్వారా చూసిన నాగార్జున.. బాబాను అడిగారు. దీంతో బాబా మళ్లీ ఎమోషనల్ అయ్యారు. నాగార్జున ఎదుటే కంటతడి పెట్టారు.
ఇదిలా ఉంటే, అందరూ ఊహించినట్టే ఈవారం హౌస్ నుంచి మహేష్ విట్ట ఎలిమినేట్ అయ్యాడు. సన్ డే‌ను ఫన్నీ టాస్క్‌‌తో మొదలుపెట్టిన నాగార్జున మొదట రాహుల్‌ని సేఫ్ జోన్‌లో వేశారు. ఇక మిగిలింది వరుణ్, మహేష్. కాసేపు ‘అమ్మ తోడు అంతా నిజమే చెప్తా’ అనే టాస్క్‌ను ఆడించిన కింగ్.. ఆ తరవాత ఫైనల్‌గా మహేష్ ఎలిమినేట్ అయినట్టు ప్రకటించారు. మహేష్ ఎలిమినేషన్‌ను ఎవరూ పెద్దగా ఫీలయినట్టు కనిపించలేదు. సరదాగా, నవ్వుతూ సాగనంపేశారు. ఇంటిలో నుంచి బయటికి వస్తూ బాబా భాస్కర్ కాళ్లకు మహేష్ నమస్కారం చేశాడు.
స్టేజ్ మీదికి వచ్చిన మహేష్‌కు నాగార్జున ఒక టాస్క్ ఇచ్చారు. హౌస్‌లో ఉన్న ఏడుగురు కంటెస్టెంట్ల ఫొటోలను మహేష్‌కు నాగార్జున ఇచ్చారు. ఈ ఏడుగురిలో నంబర్ వన్ కంటెస్టెంట్ ఎవరో వాళ్ల ఫొటోను బోర్డుపై అతికించాలని చెప్పారు. ఇక మిగిలిన ఫొటోలను మహేష్ ఇష్టాన్ని బట్టి రెండు, మూడు అంతకన్నా ఎక్కువ ముక్కలుగా చించొచ్చని చెప్పారు. బాబా భాస్కర్ ఫొటోను మహేష్ బోర్డుపై అతికించాడు. మిగిలిన ఫొటోలన్నీ చిన్నగా చించేసి రకరకాల కారణాలు చెప్పేశాడు మహేష్. అలాగే బిగ్ బాంబ్‌ను శ్రీముఖి మీద విసిరాడు. ఈ బిగ్ బాంబ్ ఏంటంటే.. కిచెన్‌లోని సామగ్రి అంతటినీ శ్రీముఖే క్లీన్ చేయాలి.
ఆదివారం నాటి ఎపిసోడ్ ప్రారంభమైన వెంటనే బాబా భాస్కర్ ఎమోషన్‌ను చూపించిన నాగార్జున.. ఆ తరవాత మన టీవీ ద్వారా కంటెస్టెంట్లను పలకరించారు. వాళ్లతో సరదా టాస్క్‌లు మొదలుపెట్టేశారు. ఎనిమిది మంది సభ్యులను రెండు టీమ్‌లుగా విడగొట్టారు. ఒకటి శ్రీముఖి టీం.. మరొకటి మహేష్ టీం. ఒక బౌల్‌లో కొన్ని చిట్టీలు పెట్టారు. ఒక్కో టీం నుంచి ఒక్కో కంటెస్టెంట్ వచ్చి చిట్టీ తీసి దానిపై ఏ సినిమా పేరు రాసుందో కెమెరాకు చూపించాలి. ఈ సినిమా పేరును బోర్డుపై బొమ్మల రూపంలో వేసి తన టీం సభ్యులతో చెప్పించాలి. ఈ టాస్క్‌లో శ్రీముఖి టీం విజయం సాధించింది.