బ్రిటన్‌ రాణి ఎలిజబెత్ ను హత్య చేయడానికి ప్రయత్నించిన సిక్కు యువకుడిని పోలీసులు అరెస్టు చేసిన సంగతి తెలిసిందే. తనపేరు జస్వంత్ సింగ్ ఛాయిల్‌ అని.. తాను భారతీయుడ్నినని అతడు వెల్లడించాడు. జలియన్‌వాలా బాగ్‌ మారణకాండకు ప్రతీకారంగా ఎలిజబెత్ రాణిని అంతం చేయడానికి ప్రయత్నించినట్టు ఈ మేరకు స్నాప్‌చాట్‌లో ఓ వీడియోను షేర్ చేశాడు. ఈ వీడియోలో అతడు పూర్తిగా ముఖానికి మాస్క్ వేసుకుని ఉన్నాడు. జస్వంత్ సింగ్ మానసిక స్థితిపై పోలీసులు అనుమానాలు వ్యక్తం చేస్తున్నారు.
దీంతో ప్రస్తుతం అతడిని మానసిక వైద్యుల పర్యవేక్షణలో ఉంచారు. రాణి ఎలిజబెత్ తన కుటుంబసభ్యులతో కలిసి క్రిస్మస్‌ వేడుకలు జరుపుకోవడానికి విండ్సర్‌ క్యాజిల్‌ రాజప్రాసాదానికి శనివారం వెళ్లారు. విల్లువంటి క్రాస్‌బౌ ఆయుధంతో అక్కడకు వెళ్లిన ఆ యువకుడు.. రాణి నివాసం వరకు వెళ్లేందుకు ప్రయత్నించాడు. దీనిని గమనించిన భద్రతా సిబ్బంది యువకుడ్ని అడ్డుకుని అదుపులోకి తీసుకున్నారు. ఈ ఘటన జరగడానికి 24 నిమిషాల ముందు తీసుకున్న వీడియోనూ స్నాప్‌చాట్‌లో పెట్టాడు.
‘‘నేను చేసినదానికి.. చేయబోయేదానికి నన్ను క్షమించండి.. రాజకుటుంబానికి చెందిన ఎలిజబెత్ రాణిని హత్యచేయడానికి ప్రయత్నిస్తాను.. 1919లో జరిగిన జలియన్‌వాలాబాగ్‌ దురాగతానికి ఇది ప్రతీకారం.. జాతి పేరుతో వివక్షకు గురయి ప్రాణాలు కోల్పోయిన వారు, అవమానాలకు గురయినవారి తరఫున పగ సాధిస్తాను. నేను భారతీయ సిక్కును.. నా పేరు జస్వంత్ సింగ్ ఛాయిల్‌- డార్త్‌ జోన్స్‌’’ అని పేర్కొన్నాడు.
హాలీవుడ్ సినిమా స్టార్‌వార్స్‌లో ఓ ముసుగు మనిషి నల్లని ఆయుధాన్ని పట్టుకొని భయంకరంగా మాట్లాడినట్టుగా ఈ వీడియో అనిపించింది. స్నాప్‌చాట్‌లో ఈ వీడియో షేర్ చేసి.. ఓ సందేశం పెట్టాడు. ‘‘తప్పు చేసినందుకు, అబద్ధాలు ఆడినందుకు క్షమించండి.. ఈ వీడియో మీకు చేరిందంటే నాకు చావు దగ్గరపడినట్టే లెక్క.. అవకాశం ఉంటే దీన్ని షేర్ చేయండి.. ఆసక్తి ఉంటే దీన్ని వార్తగా ప్రసారం చేయండి’’ అని చెప్పాడు.