కర్ణాటకలోని కలబుర్గి ప్రాంతానికి చెందిన మహ్మద్ హుస్సేన్ సిద్దిఖీ వైద్యం కోసం హైదరాబాద్‌కు వచ్చిన క్రమంలో నగరంలో దాదాపు మూడు ఆస్పత్రులు తిరిగినట్లుగా తెలుస్తోంది.జనవరి చివరి వారంలో సౌదీకి వెళ్లిన సిద్దిఖీ ఫిబ్రవరి 26న భారత్‌కు తిరిగి వచ్చారు. దగ్గు, జలుబు, జ్వరం వంటి లక్షణాలతో బాధపడుతుండడంతో కుటుంబ సభ్యులు అతణ్ని మార్చి 4న గుల్బర్గాలోని ఓ ప్రైవేటు ఆస్పత్రిలో చేర్పించారు. లక్షణాలు తగ్గకపోవడంతో హైదరాబాద్ తీసుకొచ్చారు. తొలుత జూబ్లీహిల్స్‌లోని ఓ ప్రైవేటు ఆస్పత్రికి తీసుకెళ్లారు. అక్కడ చికిత్స అందించారు. తగ్గకపోవడంతో ఆ తర్వాత బంజారాహిల్స్‌లోని మరో కార్పొరేటు ఆస్పత్రికి తీసుకెళ్లినట్లుగా తెలుస్తోంది. అక్కడ చేర్చుకోకపోవడంతో మరో కార్పొరేట్ ఆస్పత్రిలోని అత్యవసర విభాగానికి తీసుకొచ్చారు. అక్కడి వైద్యులు పరీక్షించి, కరోనాగా అనుమానించారు. గాంధీ హాస్పిటల్‌లోని కరోనా ప్రత్యేక వార్డుకు తీసుకెళ్లాల్సిందిగా వారు సూచించారు.
కుటుంబ సభ్యులు గాంధీకి తీసుకెళ్లకుండా ఓ సంస్థకు చెందిన ఆంబులెన్స్‌లో మళ్లీ గుల్బర్గాకు తీసుకెళ్లిపోయారు. మంగళవారం గుల్బర్గాలోని వైద్యులు బాధితుడి నుంచి నమూనాలు సేకరించి, బెంగళూరులోని వైరాలజీ ల్యాబ్‌కు మంగళవారం పంపారు. ఆ మరుసటి రోజే కరోనా రిపోర్టులు వచ్చాయి. ఇందులో వృద్ధుడికి కరోనా పాజిటివ్‌గా తేలింది.కరోనాతో చనిపోయిన వ్యక్తి హైదరాబాద్‌లో చికిత్స పొందిన నేపథ్యంలో తెలంగాణలో ఆందోళన నెలకొంది. వైద్య ఆరోగ్యశాఖ స్పందించి సిద్దిఖీని చేర్పించిన ఆస్పత్రుల్లోని సిబ్బందికి వ్యాధి నిర్ధారణ పరీక్షలు నిర్వహించాలని ఆదేశించింది. ఈ మూడు ఆస్పత్రుల్లో సిద్దిఖీకి వైద్యం అందించిన వారు దాదాపు 10 వరకూ ఉన్నట్లు తెలుస్తోంది. హైదరాబాద్‌లో సిద్దిఖీతో దగ్గరగా ఉన్నవారిని గుర్తించి వారిని వేరుగా ఉంచాలని ప్రభుత్వం ఆదేశించింది. అంతేకాక, సిద్దిఖీ మృత దేహాన్ని భారత ప్రభుత్వం నిర్దేశించిన నిబంధనల ప్రకారం డిస్పోజ్ చేసినట్లుగా కర్ణాటక ప్రభుత్వం ప్రకటించింది. బాధితుడు హైదరాబాద్‌లోనూ చికిత్స పొందిన నేపథ్యంలో ఈ విషయాన్ని తెలంగాణ ప్రభుత్వానికి కూడా చెప్పామని కర్ణాటక ఉన్నతాధి వెల్లడించారు.