మిస్ వరల్డ్, మిస్ యూనివర్స్, మిస్ ఇండియా వంటి బ్యూటీ టైటిల్స్ గెలిచిన వారందరూ సినిమాల్లో నిలదొక్కుకుంటారన్న గ్యారంటీ ఉండదు. అందం తోడైతే సరిపోదు, నటన, హావభావాలు, డ్యాన్స్ కూడా తప్పనిసరి అని సినీ ప్రపంచం పదే పదే నిరూపించింది. ఇదే నిజం మాజీ మిస్ వరల్డ్ Priyanka Chopra విషయంలోనూ ఎదురైంది.
2000లో మిస్ వరల్డ్గా నిలిచిన ప్రియాంక, రెండేళ్లకే తమిళంలో విజయ్ సరసన ‘Tamilan’తో తెరంగేట్రం చేసింది. 2003లో బాలీవుడ్లో అడుగుపెట్టిన ఆమె, అక్కడ చేసిన రెండో సినిమా ‘Andaz’ షూటింగ్ సమయంలో ఓ చేదు అనుభవాన్ని ఎదుర్కొంది. తాజాగా ఓ ఇంటర్వ్యూలో, 23 ఏళ్ల క్రితం జరిగిన ఆ సంఘటనను ప్రియాంక గుర్తు చేసుకుంది.
ఇండస్ట్రీలోకి వచ్చిన తొలినాళ్లలో డ్యాన్స్ తనకు పెద్ద సవాలుగా మారిందని ఆమె చెప్పింది. స్టెప్స్ వేయడం, కళ్లతో ఎక్స్ప్రెషన్స్ ఇవ్వడం, అన్నీ ఒకేసారి చేయడం చాలా కష్టంగా అనిపించేదట. ‘అందాజ్’ సినిమా కోసం సౌతాఫ్రికాలో పాట షూటింగ్ జరుగుతున్న సమయంలో, ప్రముఖ కొరియోగ్రాఫర్ Raju Khan తన డ్యాన్స్పై అసహనం వ్యక్తం చేస్తూ అందరి ముందే గట్టిగా మందలించారట. మైక్ విసిరేసి వెళ్లిపోయి, “అందంగా ఉంటే సరిపోదు. నటిగా నిలవాలంటే డ్యాన్స్ రావాలి. వెళ్లి నేర్చుకుని రా” అని ఘాటుగా అన్నారని ప్రియాంక వెల్లడించింది.
ఆ మాటలే తనను మార్చేశాయని ప్రియాంక చెబుతోంది. అప్పటినుంచి పట్టుదలతో డ్యాన్స్ నేర్చుకుని, రోజుకు ఆరు గంటల పాటు Katrina Kaif తో కలిసి ప్రాక్టీస్ చేసిందట. ఆ కష్టమే ఆమెను ఈరోజు బాలీవుడ్లోని టాప్ యాక్టర్స్, బెస్ట్ డ్యాన్సర్లలో ఒకరిగా నిలబెట్టింది. ‘అందాజ్’ తర్వాత ప్రియాంక నుంచి వచ్చిన ఎన్నో డ్యాన్స్ నెంబర్లు ఇప్పటికీ అభిమానులను అలరిస్తూనే ఉన్నాయి.
ఇప్పుడూ ఆమె జోరు తగ్గలేదు. S. S. Rajamouli దర్శకత్వంలో Mahesh Babu నటిస్తున్న ‘వారణాసి’ ప్రాజెక్ట్లో కూడా ప్రియాంకకు ఓ పవర్ఫుల్ డ్యాన్స్ నెంబర్ ఉందన్న టాక్ వినిపిస్తోంది. ఒకప్పటి తిట్టు, ఈరోజు ట్రెండ్గా మారిన కథ ఇదే.