తమిళ చిత్ర పరిశ్రమలో రజనీకాంత్, కమల్ హాసన్ వంటి సూపర్‌స్టార్స్ ఉన్నారు. వీరితో సినిమాలు చేయాలంటే భారీ బడ్జెట్ కావాల్సిందే. ఒకవేళ సినిమాలు బాగా ఆడకపోయినా కలెక్షన్లు మాత్రం బాగానే వస్తాయి. కానీ తమిళ చిత్ర పరిశ్రమలో బ్యాంకబుల్ హీరోలు ఎవరైనా ఉన్నారంటే అది కేవలం విజయ్ మాత్రమేనట. ఈ మాట అంటోంది ప్రముఖ తమిళ నిర్మాత అర్చన కళాపది. విజయ్ ప్రధాన పాత్రలో నటిస్తున్న ‘బిగిల్’ సినిమాకు అర్చన నిర్మాతగా వ్యవహరిస్తున్నారు. దాదాపు రూ.180 కోట్ల రూపాయలతో ఈ సినిమాను నిర్మిస్తున్నారు. ఈ సందర్భంగా అర్చన.. విజయ్‌పై తన అభిప్రాయాన్ని వెల్లడించారు.
రూ.180 కోట్లు ఖర్చు పెట్టాలంటే చాలా ఆలోచించాలని అర్చన అన్నారు. సినిమాలో విజయ్ నటిస్తున్నాడు కాబట్టే అంత డబ్బు వెచ్చించానని తెలిపారు. విజయ్ కాకుండా మరో హీరో నటించి ఉంటే మాత్రం అంత డబ్బు పెట్టేదాన్ని కానని పేర్కొన్నారు. తమిళ చిత్ర పరిశ్రమలో మోస్ట్ బ్యాంకబుల్ స్టార్ ఎవరైనా ఉన్నారంటే అది కేవలం విజయ్ మాత్రమేనని అంటున్నారు. ఆయనతో సినిమా తీస్తే పెట్టిన బడ్జెట్ ఏ రూపంలోనైనా తిరిగి చేతికొచ్చేస్తుందని తెలిపారు. స్పోర్ట్స్ బేస్డ్ డ్రామాగా తెరకెక్కిన బిగిల్ సినిమాలో నయనతార కథానాయికగా నటించారు. ఈ సినిమాకు అట్లీ దర్శకత్వం వహించారు. ఇటీవల విడుదలైన ఈ సినిమా ట్రైలర్‌కు విశేషమైన స్పందన లభించింది. ఈ ట్రైలర్‌ విడుదలైన కొద్ది గంటల్లోనే రికార్డ్ వ్యూస్‌ సాధించి ఆల్ టైం రికార్డ్ సృష్టించింది.
బిగిల్ ట్రైలర్‌ను పది నిమిషాల్లోనే 20 లక్షల మంది వీక్షించగా, మొదటి గంటలో దాదాపు 6 మిలియన్‌ (60 లక్షల)కు పైగా వీక్షించారు. సోషల్ మీడియాలో టాప్‌లో ట్రెండ్‌ అయిన ఈ ట్రైలర్‌ను రెండు గంటల 45 నిమిషాల్లోనే కోటి మందికి పైగా వీక్షించటం విశేషం. అంతేకాదు కేవలం ఒక్క గంటలోనే ఈ ట్రైలర్‌ పది లక్షలకు పైగా లైకు సాధించి మరో రికార్డ్‌ను తన ఖాతాలో వేసుకుంది.అక్టోబర్ 27న బిగిల్ సినిమా ప్రేక్షకుల ముందుకు రాబోతోంది.