దీపం ఉండ‌గానే ఇల్లు చ‌క్క‌బెట్టుకోవ‌డంలో మ‌న క‌థానాయిక‌ల్ని మించిన‌వాళ్లు లేరు. ఫామ్ లో ఉండ‌గానే, సినిమాలు చ‌క చ‌క చేసేసి, ఆస్తులు కూడ‌బెట్టుకుని సెటిల్ అవ్వాల‌ని చూస్తుంటారు. ఈ విష‌యంలో రకుల్ ప్రీత్ సింగ్ అంద‌రికంటే ముందే ఉంటుంది. వ‌చ్చిన కొత్త‌లోనే హైద‌రాబాద్‌లో ఓ ఇల్లు కొనుక్కుంది. ఇప్పుడు బెంగ‌ళూరులో ఓ ఫ్లాటు కూడా త‌న సొంతం చేసుకుంద‌ని స‌మాచారం. బెంగ‌ళూరులోని అత్యంత ఖ‌రీదైన ప్ర‌దేశంలో రూ.6 కోట్ల‌తో ఓ ఫ్లాటు తీసుకుంద‌ట రకుల్. అక్క‌డ ర‌కుల్‌కి కొంత‌మంది స్నేహితులు ఉన్నారు. వాళ్ల స‌ల‌హాలు, సూచ‌న‌లు తీసుకొనే బెంగ‌ళూరులో ఫ్లాట్ కొన్న‌ద‌ని తెలుస్తోంది. హైద‌రాబాద్‌లో రకుల్ సొంతంగా ఓ జిమ్ నిర్వ‌హిస్తోంది. బెంగ‌ళూరులో కూడా అలానే బ్రాంచీలు తెర‌వాల‌ని చూస్తోంద‌ట. ఈమ‌ధ్య ర‌కుల్‌ప్రీత్ సింగ్ హ‌వా కాస్త త‌గ్గిన‌ట్టు అనిపించింది. అయితే బాలీవుడ్‌లో ఓ మంచి విజ‌యం అందుకోవ‌డంతో తిరిగి ఫామ్ లోకి వ‌చ్చిన‌ట్టైంది.