రానా, ప్రభాస్ కలిసి నటించిన బాహుబాలి ఎంత సూపర్‌ డూపర్‌ హిట్టో ప్రత్యేకంగా చెప్పనక్కర్లేదు. ప్రభాస్ తాజాగా ఒక పీరియాడిక్‌ లవ్‌ స్టోరీలో నటించబోతున్న విషయం తెలిసిందే.ఈ సినిమాను రాధాకృష్ణ తెరకెక్కిస్తున్నాడు. ఈ సినిమాకు ‘రాధే శ్యామ్‌’ అనే టైటిల్‌ పెట్టే యోచనలో చిత్ర యూనిట్‌ ఉన్నట్లు తెలుస్తోంది. దీనికి సంబంధించిన షూటింగ్‌ను జూలై రెండో వారం నుంచి రామోజీ ఫిలిం సిటీలో ప్రారంభం కానున్నట్లు సమాచారం.
ఈ క్రమంలో ఈ సినిమాకు సంబంధించి ఒక ఆసక్తికరమైన విషయం టాలీవుడ్‌ సర్కిళ్లలో చక్కర్లు కొడుతోంది. బాహుబలిలో భల్లాల దేవగా ప్రభాస్‌తో కలిసి నటించి జాతీయస్థాయిలో గుర్తింపు తెచ్చుకున్న రానా ఇప్పుడు రాధేశ్యామ్‌ సినిమాలో గెస్ట్‌రోల్‌ చేయబోతున్నట్లు ఫిల్మ్‌నగర్‌ టాక్‌. అయితే కేవలం రెండు నిమిషాల పాటు మాత్రమే రానా ఈ సినిమాలో కనిపించనున్నాడట. అయితే ఈ వార్తలపై ఎలాంటి అధికారిక ప్రకటన వెలువడలేదు. ఈ సినిమాలో ప్రభాస్ సరసన పూజా హెగ్డె నటించనున్నారు. యువీ క్రియేషన్స్‌, గోపి కృష్ణ మూవీస్‌ సంయుక్తంగా ఈ సినిమాను తెరకెక్కిస్తున్నాయి. ఈ సినిమా కూడా వివిధ భాషల్లో రిలీజ్‌ కాబోతుంది.