సాధారణంగా ఓ పేరు బాగుంది అనిపిస్తే అది మన పిల్లలకు పెట్టుకుంటాం. లేదంటే మన స్నేహితుల పిల్లలకు సూచిస్తాం. ఒకవేళ ఆ అవకాశం లేకపోతే మన పెంపుడు జంతువులకు పెట్టుకుంటాం. కానీ.. సింహాలకు, పులులకు పెట్టగలమా? కానీ, రేణు దేశాయ్ పేరును ఓ సింహానికి పెట్టారు. ఈ విషయాన్ని ఆమెనే స్వయంగా చెప్పారు. ఇన్‌స్టాగ్రామ్‌లో యాక్టివ్‌గా ఉండే రేణు దేశాయ్ తన అభిమానుల కోసం రోజుకో విషయాన్ని చెబుతూ ఉంటారు. కవిత్వాలు రాస్తుంటారు. రోజుకో ఫొటోను పోస్ట్ చేస్తూ ఉంటారు. మొత్తంగా రోజూ అభిమానులతో టచ్‌లో ఉంటారు.
అయితే, శుక్రవారం ఆమె అభిమానులకు ఒక కొత్త విషయం చెప్పారు. ఇది 18 ఏళ్ల క్రితం రోమ్‌లో జరిగిన కథ. ‘‘ఒక ఆడ సింహం పిల్లను పట్టుకున్నప్పుడు నాకు చాలా సంతోషంగా, థ్రిల్లింగ్‌గా అనిపించింది. సింహం పిల్ల పేరు ఏంటి అని నేను అడిగినప్పుడు, మీ పేరేమిటి అని ఆ వణ్యప్రాణి సంరక్షణ కేంద్రం యజమాని నన్ను అడిగారు. నేను ‘రేణు’ అని చెప్పాను. మనం ఈ సింహం పిల్లకు ‘రేణు’ అని పేరు పెడుతున్నాం అని ఆయన బదులిచ్చారు. నాకు చాలా ఆశ్చర్యం వేసింది. ప్రపంచంలో ఎక్కడో నా పేరు మీద ఒక బుజ్జి ఆడ సింహం ఉండనుందని చాలా ఆనందపడ్డాను’’ అని రేణు దేశాయ్ ఇన్‌స్టాగ్రామ్‌లో పేర్కొన్నారు.
సింహం పిల్లను ఎత్తుకున్న ఫొటోలను రేణు దేశాయ్ తన పోస్టులో పొందుపరిచారు. అందులో రెండో ఫొటోలో తన రియాక్షన్ సింహం పిల్లకు తన పేరు పెడుతున్నట్టు చెప్పినప్పుడుదని రేణు దేశాయ్ పేర్కొన్నారు. అయితే, సింహం పిల్లను ఎత్తుకున్నప్పుడు దాని బొచ్చు మృదువుగా ఏమీ లేదని.. గరుకుగా తగిలిన ఫీలింగ్ కలిగిందని రేణు చెప్పారు. సుమారు 18 ఏళ్ల క్రితం రోమ్‌లో ఈ సంఘటన చోటుచేసుకుందని వెల్లడించారు.