దర్శక ధీరుడు రాజమౌళి తన సినిమాలను ఎంత భారీగా తెరకెక్కిస్తారో అంతే భారీగా మార్కెటింగ్ కూడా చేస్తారు. సినిమాను ప్రమోట్ చేయడంలో కూడా రాజమౌళిది అందె వేసిన చేయి. ప్రస్తుతం ఆయన తెరకెక్కిస్తున్న భారీ మల్టీస్టారర్ చిత్రం `ఆర్ఆర్ఆర్`. యంగ్ టైగర్ ఎన్టీయార్, రామ్‌చరణ్‌తోపాటు పలు భాషలకు చెందిన ప్రముఖ నటులు ఈ సినిమాలో కీలక పాత్రలు పోషిస్తున్నారు. దసరా సందర్భంగా ఈ సినిమా అక్టోబర్ 13న విడుదల కాబోతున్నది .
ప్రస్తుతం ఈ సినిమా షూటింగ్ చివరి దశకు చేరుకుంది. త్వరలోనే పోస్ట్-ప్రొడక్షన్ పనులు ప్రారంభం కాబోతున్నాయి. సినిమా విడుదలకు ఇంకా చాలా రోజుల సమయం ఉన్నప్పటికీ ప్రమోషన్ కార్యక్రమాలను ప్రారంభించాలని రాజమౌళి భావిస్తున్నారట. ఈ సినిమా తెలుగుతోపాటు దేశవ్యాప్తంగా పలు భాషల్లో విడుదల కాబోతోంది. అందుకే వినూత్నంగా ప్రమోషన్స్‌ను ప్లాన్ చేసి విడుదల తేదీ సమయానికి అన్ని భాషల్లోనూ హైప్‌ను మరింత పెంచాలనుకుంటున్నారట. ముఖ్యంగా హీరోలకు బాలీవుడ్‌ ప్రేక్షకుల్లో క్రేజ్ తీసుకొచ్చే విధంగా ప్రమోషన్స్‌ను ప్లాన్ చేస్తున్నారట.