‘ఓదెల’ ఫ్రాంచైజ్తో మంచి విజయాన్ని అందుకున్న దర్శకుడు సంపత్ నంది (sampath nandi), ఇప్పుడు తన తదుపరి సినిమాతో ప్రేక్షకుల ముందుకు వచ్చేందుకు సిద్ధమవుతున్నారు. ఎస్డిఎల్పి అఫీషియల్ నిర్మాణ సంస్థతో కలిసి ఆయన కొత్త ప్రాజెక్ట్ను తెరకెక్కించనున్నారు. ఈ కాంబినేషన్లో రూపొందనున్న ‘ప్రొడక్షన్ నంబర్ 2’ చిత్రాన్ని మేకర్స్ అధికారికంగా ప్రకటించారు.
గ్రామీణ నేపథ్యంలో సాగే ఈ కథలో పల్లె జీవనం, అక్కడి ప్రజల భావోద్వేగాలు, జీవన విధానం ప్రధానంగా ఉండనున్నట్లు చిత్రబృందం వెల్లడించింది. నేల పరిమళాన్ని ప్రతిబింబించేలా బలమైన కథాంశంతో ఈ సినిమాను రూపొందించనున్నట్లు తెలిపింది. సంపత్ నంది తనదైన శైలిలో ఈ చిత్రాన్ని తెరకెక్కించనున్న నేపథ్యంలో సినిమాపై ఇప్పటి నుంచే ఆసక్తి నెలకొంది.
ఈ కొత్త ప్రాజెక్ట్ ప్రారంభోత్సవ కార్యక్రమాన్ని ఆగస్టు 14, 2026న మధ్యాహ్నం 1 గంటలకు రామానాయుడు స్టూడియోస్లో ఘనంగా నిర్వహించనున్నారు. పూజా కార్యక్రమాలతో సినిమా నిర్మాణ పనులను అధికారికంగా ప్రారంభించనున్నారు.
ఇక ఈ చిత్రానికి సంబంధించిన టైటిల్, కథానాయకుడు, ఇతర నటీనటులు, సాంకేతిక నిపుణులు సహా పూర్తి వివరాలను త్వరలోనే వెల్లడించనున్నట్లు మేకర్స్ తెలిపారు. సంపత్ నంది కొత్త ప్రాజెక్ట్ ఎలాంటి కథతో రాబోతుందో తెలియాలంటే మరికొంత కాలం వేచి చూడాల్సిందే.
