తన యాప్‌కు కొత్త అప్‌డేట్‌ను తీసుకొచ్చింది ట్రూకాలర్. ట్రూకాలర్ వెర్షన్ 12 పేరుతో విడుదల చేసిన ఈ అప్‌డేట్‌తో ఆసక్తికరమైన ఫీచర్లను ప్రవేశపెట్టింది. అలాగే యాప్ యూజర్ ఇంటర్ఫేస్ లోనూ మార్పులు తీసుకొచ్చింది. భారత్‌లోని ఆండ్రాయిడ్ యూజర్లకు ఇప్పటికే ఈ అప్‌డేట్‌ అందుబాటులోకి వచ్చింది. ట్రూకాలర్ వెర్షన్ 12 అప్‌డేట్‌తో వచ్చిన కొత్త ఫీచర్లు, మార్పులు ఇవే..
ముందుగా ఓ షార్ట్ వీడియో రికార్డు చేసుకొని మీ ఫ్రెండ్స్, కుటుంబ సభ్యులకు ఫోన్ చేసినప్పుడు ఆటోమేటిక్ గా ఆ వీడియో వారికి ప్లే అయ్యేలా సెట్ చేసుకునే ఫీచరే వీడియో కాలర్ ఐడీ. సెల్ఫీ వీడియో రికార్డింగ్ తో పాటు బుల్ట్ ఇన్ గా ఉన్న వీడియో టెంప్లేట్స్ ను కూడా ఇందుకోసం వినియోగించుకోవచ్చు.
కాల్ రికార్డింగ్ ఆప్షన్ ద్వారా ఇన్ కమింగ్, ఔట్ గోయింగ్స్ కాల్స్ ను యూజర్లు రికార్డు చేసుకోవచ్చు. ఆ రికార్డింగ్స్ అన్నీ ఫోన్ మెమరీలోనే సేవ్ అవుతాయి. ఈ అప్‌డేట్‌ ముందు వరకు ఈ ఫీచర్ సబ్‌స్క్రిప్షన్ తీసుకున్న పెయిడ్ మెంబర్లకే ఉండగా.. ఇప్పుడు ఆండ్రాయిడ్ యూజర్లందరూ ఉచితంగా వినియోగించుకోవచ్చు.
ఫోన్ చూడకుండానే ఎవరు కాల్ చేస్తున్నారో తెలుసుకునేందుకు ఈ ఫీచర్ ఉపయోగపడుతుంది. దీన్ని ఎనేబుల్ చేసుకుంటే ఎవరు ఫోన్ చేస్తున్నా సేవ్ అయిన పేరు అనౌన్స్ మెంట్ వస్తుంది. ఒకవేళ కాంటాక్ట్స్ లో సేవ్ చేసుకోని నంబర్ నుంచి కాల్ వస్తే.. నంబర్ అనౌన్స్ అవుతుంది. ఈ కాల్ అనౌన్స్ ఫీచర్ ప్రీమియమ్, గోల్డ్ సబ్‌స్క్రైబర్లకు అందుబాటులో ఉంటుంది
యూజర్లు ఏ పేరైనా, ఏ నంబరైనా, ఫొటో అయినా సెట్ చేసుకునే సదుపాయం కల్పించేదే ఘోస్ట్ కాల్ ఫీచర్. ఇలా ఏ కాంటాక్టుకైనా సెట్ చేసుకోవచ్చు. అలా చేసుకున్న నంబర్ నుంచి కాల్ వస్తే సెట్ చేసుకున్న పేరు, నంబర్, ఫొటో కనిపిస్తాయి. ఘోస్ట్ కాల్ ఫీచర్ కూడా ట్రూకాలర్ ప్రీమియమ్, గోల్డ్ సబ్‌స్క్రైబర్లకు మాత్రమే అందుబాటులో ఉంటుంది.
ట్రూకాలర్ ప్రీమియమ్ మూడు నెలల సబ్‌స్క్రిప్షన్ ధర రూ.179 ఉండగా.. ఆరు నెలలకు రూ.339, సంవత్సరానికి రూ.529గా ఉంది. అదే ట్రూ కాలర్ గోల్డ్ మెంబర్ షిప్ కావాలంటే ఏడాదికి రూ.2500 చెల్లించాల్సి ఉంటుంది.
కాల్ చేస్తున్నది ఎవరో ధృవీకరించుకునేందుకు, అవసరం లేని కాల్స్ ను బ్లాక్ చేసేందుకు ఎక్కువ మంది స్మార్ట్‌ఫోన్‌ యూజర్లు ట్రూకాలర్ వాడుతున్నారు. ప్రపంచవ్యాప్తంగా 30కోట్ల మంది ట్రూకాలర్ వినియోగిస్తున్నారని ఇటీవల గణాంకాలు వెలువడ్డాయి. ఈ నేపథ్యంలో యూజర్లకు మరిన్ని ఫీచర్లు అందించేందుకు ట్రూకాలర్ క్రమంగా అప్‌డేట్‌లను తీసుకొస్తోంది.