కోలీవుడ్‌ టాప్‌ హీరో విజయ్‌ డ్యూయల్‌ రోల్ చేస్తున్న సినిమా బిగిల్ (తెలుగులో విజిల్‌) దీపావళి కానుకగా ప్రేక్షకుల ముందుకు రానుంది. ఇప్పటికే ప్రమోషన్‌ కార్యక్రమాలు ప్రారంభించిన చిత్రయూనిట్‌ తాజాగా ట్రైలర్‌ను రిలీజ్ చేశారు. ఈ ట్రైలర్‌ విడుదలైన కొద్ది గంటల్లోనే రికార్డ్ వ్యూస్‌ సాధించి ఆల్ టైం రికార్డ్ సృష్టించింది.బిగిల్ ట్రైలర్‌ను పది నిమిషాల్లోనే 20 లక్షల మంది వీక్షించగా, మొదటి గంటలో దాదాపు 6 మిలియన్‌కు పైగా వీక్షించారు. సోషల్ మీడియాలో టాప్‌లో ట్రెండ్‌ అయిన ఈ ట్రైలర్‌ను రెండు గంటల 45 నిమిషాల్లోనే కోటి మందికి పైగా వీక్షించటం విశేషం.
అంతేకాదు కేవలం ఒక్క గంటలోనే ఈ ట్రైలర్‌ పది లక్షలకు పైగా లైకు సాధించి మరో రికార్డ్‌ను తన ఖాతాలో వేసుకుంది.కేవలం రిలీజ్ అయిన 12 గంటల్లోనే 13 మిలియన్‌లకు పైగా వ్యూస్‌ సాధించిన బిగిల్ సరికొత్త రికార్డ్‌ను నెలకొల్పింది. కళ్లుచెదిరే యాక్షన్‌ సీన్స్‌తో రూపొందించిన బిగిల్ ట్రైలర్‌లో సినిమాలోని విజయ్‌ డిఫరెంట్‌ లుక్స్‌ను రివీల్‌ చేశారు.
బాలీవుడ్ స్టార్స్‌ సైతం బిగిల్ ట్రైలర్‌ సూపర్బ్ అంటూ కితాబిస్తున్నారు. బాద్‌ షా షారూఖ్‌ ఖాన్‌, దర్శక నిర్మాత కరణ్‌ జోహర్‌లు బిగిల్ ట్రైలర్‌ను తన సోషల్ మీడియా పేజ్లో పోస్ట్ చేసిన చిత్రయూనిట్‌కు శుభాకాంక్షలు తెలియజేశారు. పలువురు ట్రేడ్ ఎనలిస్ట్‌లు సైతం ఈ ట్రైలర్‌పై స్పదించారు.యువ దర్శకుడు అట్లీ తెరకెక్కిస్తున్న ఈ సినిమాలో విజయ్‌ ఫుట్‌బాల్‌ కోచ్‌గా, గూండాగా రెండు విభిన్న పాత్రల్లో కనిపిస్తున్నాడు. గతంలో అట్లీ విజయ్‌ కాంబినేషన్‌లో తెరకెక్కిన తేరి (తెలుగులో పోలీస్‌), మెర్సల్‌ (తెలుగులో అదిరింది) సినిమాలు ఘన విజయం సాధించటంతో ఈ సినిమాపై భారీ అంచనాలు ఏర్పడ్డాయి.
అందుకు తగ్గట్టుగా 180 కోట్ల బడ్జెట్‌తో ఈ సినిమాను తెరకెక్కిస్తున్నారు. విజయ్‌ సరసన నయనతార హీరోయిన్‌గా నటిస్తున్న ఈ సినిమాలో బాలీవుడ్ నటుడు జాకీ ష్రాఫ్ కీలక పాత్రలో నటిస్తున్నాడు. వివేక్‌, కదిర్, డానియల్‌ బాలాజీ, ఆనంద్ రాజ్‌, యోగి బాబు తదితరులు ఇతర కీలక పాత్రల్లో నటిస్తున్నారు.మ్యూజిక్‌ లెజెండ్‌ ఏఆర్‌ రెహమాన్‌ సంగీతం అందిస్తున్నాడు.