వివాహేతర సంబంధం హత్యాయత్నానికి దారితీసిన కృష్ణా జిల్లా గుడివాడలో చోటుచేసుకుంది. గుడివాడలోని వాంబే కాలనీలో నివాసముంటున్న కోసూరు మురళీకృష్ణ భార్యతో గొడవపడి కొంతకాలంగా వేరుగా ఉంటున్నాడు. ఈ నేపథ్యంలో మురళీకృష్ణ భార్య ఏ.కొండూరు మండలం చీమలపాడు గ్రామానికి చెందిన గోకరాజు అనే వ్యక్తితో సహజీవనం సాగిస్తోంది. ఈ విషయం తెలుసుకున్న మురళీకృష్ణ గోకరాజును ఎలాగైనా అంతమొందించాలని నిర్ణయించుకున్నాడు. ఈ నేపథ్యంలో శనివారం రాత్రి వాంబే కాలనీలో తన భార్యతో గోకరాజు ఉండటాన్ని మురళీకృష్ణ గుర్తించాడు. కత్తితో అతనిపై ఒక్కసారిగా విచక్షణ రహితంగా దాడిచేసి తీవ్రంగా గాయపర్చాడు. ఈ దాడిలో గోకరాజు ఛాతిభాగం, కంటిపై తీవ్ర గాయాలయ్యాయి. ఆ క్రమంలో తేరుకున్న మురళీకృష్ణ భార్య భర్త కళ్లల్లో కారం చల్లి ప్రియుడితో సహా పరారైంది. దీంతో మురళీకృష్ణ ఆగ్రహంతో గోకరాజు బైక్‌కు నిప్పు పెట్టాడు. ఈ ఘటనపై సమాచారం అందుకున్న గుడివాడ పోలీసులు బాధితుడిని ఆస్పత్రిలో చేర్పించి చికిత్స అందించారు. నిందితుడు మురళీకృష్ణపై కేసు నమోదు చేసుకుని దర్యాప్తు చేపట్టినట్లు ఎస్సై వెంకటేశ్వరరావు తెలిపారు.