కరోనా వైరస్ ప్రపంచ దేశాలను వణికించేస్తుంది. భారత్ లో కూడా రోజురోజుకీ కరోనా కేసులు విపరీతంగా పెరుగుతున్నాయి. ఇప్పటికే ఇండియాలో కరోనా కారణంగా అన్నీ బందే చేసి రెండు నెలల పాటు లాక్ డౌన్ లో ఉంది. అయితే ఈ కరోనాతో వలస కూలీల బ్రతుకులు మరింత దిగజారిపోయాయి.
తాజాగా ఉత్తరప్రదేశ్‌లోని బస్తీ జిల్లాలో 50 మంది వలస కార్మికులకు కరోనా పాజిటివ్‌ నిర్ధారణ అయింది. ఈ వలస కూలీలంతా గత వారం మహారాష్ట్ర నుంచి సొంత జిల్లా అయిన బస్తీకి చేరుకున్నారు. కూలీలందరికి కరోనా పరీక్షలు నిర్వహించారు. వారందరికీ సుమారు 50 మందికి ఈ వైరస్ సోకినట్లు వైద్యాధికారులు ప్రకటించారు. కరోనా బాధితులందరినీ ఐసోలేషన్‌ సెంటర్లకు తరలించినట్లు అధికారులు వెల్లడించారు.
కాగా ఈ వలస కూలీలైన 50 మందితో సన్నిహితంగా మెలిగిన వారిని గుర్తించే పనిలో అధికారులు నిమగ్నమయ్యారు. అదేవిధంగా కమ్యూనిటీ ట్రాన్స్‌మిషన్‌ జరగకుండా చర్యలు తీసుకుంటున్నట్లు కూడా వెల్లడించారు. కాగా మొత్తంగా బస్తీ జిల్లాలో కరోనా పాజిటివ్‌ కేసుల సంఖ్య 104కు చేరుకుంది. ఈ వైరస్ నుంచి ఇప్పటివరకు ఆ జిల్లాలో 28 మంది కోలుకుని డిశ్చార్జి అయ్యారు. మిగతా వారు చికిత్స పొందుతున్నట్లు అధికారులు స్పష్టం చేశారు.
