ఇటీవల కొందరు దర్శకనిర్మాతలు జంతువులను ప్రధానపాత్రలో పెట్టి వైవిధ్య‌మైన క‌థ‌లతో సినిమాలను రూపొందిస్తున్నారు. రాజేంద్రుడు గజేంద్రుడు మొదలు మొన్నటి ఈగ దాకా ఇలాంటి చిత్రాలకు మంచి కూడా ఆద‌ర‌ణ లభిస్తోంది. హాలీవుడ్‌లో కూడా జంతువులు ప్రధానపాత్రలో నటించిన సినిమాలు విడుదలయ్యాయి. టాలీవుడ్‌లో ఆ మ‌ధ్య పందిపిల్ల ప్రధానపాత్రలో రవిబాబు అదుగో అనే సినిమాను రూపొందించిన సంగ‌తి తెలిసిందే. ఈ చిత్రానికి వినూత్నంగా ప్ర‌చారం చేశాడు రవిబాబు. పంది పిల్ల‌కి ప‌ళ్ళు తోమ‌డం, పందిపిల్లతో క‌లిసి పుష‌ప్స్ చేయ‌డం, పందిపిల్లతో క‌లిసి క్యూలో నిలుచోవ‌డం వంటివి చేశాడు.
ఈ చిత్రం కోసం ఏకంగా రెండు సంవ‌త్స‌రాల స‌మయం కేటాయించాడు. కాని అదుగో చిత్రం బాక్సఫీస్ దగ్గర నిరాశపరిచింది. అయితే ప్ర‌స్తుతం త‌మిళంలోను అదుగో కాన్సెప్ట్‌తో ఓ చిత్రం తెర‌కెక్కుతుంది. ‘పన్నికుట్టి’ అనే పేరుతో తెర‌కెక్కుతున్న ఈ చిత్రంలో యోగిబాబు, క‌రుణ ముఖ్య పాత్ర‌ల‌లో న‌టిస్తున్నారు. అనుచ‌ర‌ణ్ దర్శకత్వం వహిస్తున్న ఈ చిత్రాన్ని లైకా ప్రొడ‌క్ష‌న్స్ నిర్మిస్తుంది. తాజాగా చిత్ర ఫ‌స్ట్‌లుక్ విడుద‌ల చేశారు. ఇది చూస్తుంటే అదుగోకి రీమేక్‌గా ఈ చిత్రం చేస్తున్నారా అనే అనుమానం జ‌నాల‌లో క‌లుగుతుంది. మ‌రి త్వ‌ర‌లో విడుద‌ల కానున్న ఈ చిత్రం ఎలాంటి ఫ‌లితాన్ని సాధిస్తుందో చూడాలి.
