ఏపీ మాజీ స్పీకర్ కోడెల శివప్రసాద్ తనయుడు కోడెల శివరామ్ మీద మరిన్ని కేసులు నమోదవుతున్నాయి. తాజాగా ఆయన స్టార్ టీవీ ప్రసారాలను పైరసీ చేసి ‘కె ఛానల్’ నిర్వహిస్తున్నట్లు బ్రాడ్ క్యాస్టింగ్ అధికారులు గుర్తించారు. గౌతమ్ కమ్యూనికేషన్ పేరిట ఈ ఛానల్ ను నిర్వహిస్తున్నారని గుర్తించారు. డీటీహెచ్ ద్వారా సాంకేతిక చోరీకి పాల్పడుతున్న శివరాం, ప్రతినెలా లక్షల రూపాయలు అక్రమార్జనకు పాల్పడ్డారని ఈ విషయమై గతంలో తాము పోలీసులకు ఫిర్యాదు చేయగా తండ్రి అధికారంలో ఉండడంతో పట్టించుకోలేదనీ, దీంతో ఢిల్లీ హైకోర్టును ఆశ్రయించామని చెప్పారు. దీంతో కోర్టు అడ్వొకేట్ కమిషన్ ను ఏర్పాటు చేసిందన్నారు. ఈ కమిషన్ రాజాగారి కోట ప్రాంతంలో కోడెల ఇంట్లో నిర్వహిస్తున్న ‘కె ఛానల్’ ఆఫీసుపై ఏప్రిల్ 18న దాడులు నిర్వహించింది. ఈ దాడుల్లో సాంకేతిక చౌర్యానికి వాడుతున్న డీకోడర్, ఎన్ కోడర్ లను స్వాధీనం చేసుకుందని చెప్పారు. ఈ వివరాలను కమిషన్ కోర్టుకు సమర్పించింది. కాగా, ఈ వ్యవహారంలో కోర్టు సమన్లను ఇచ్చేందుకు నిన్న కోడెల ఇంటికి వెళ్లగా అక్కడి సిబ్బంది నిరాకరించారని స్టార్ టీవీ ప్రతినిధి తెలిపారు. ఈ నేపథ్యంలో కోర్టు ధిక్కరణ కింద కోడెల శివరామ్ పై చర్యలు తీసుకోవాల్సిందిగా కమిషన్ న్యాయస్థానానికి నివేదిక అందజేస్తుందని పేర్కొన్నారు.