తన చిన్నారి అభిమాని మరణాన్ని నందమూరి బాలకృష్ణ జీర్ణించుకోలేకపోతున్నారు. వెండితెరపై తాను చెప్పిన పవర్‌ఫుల్ డైలాగులను ఒక చిన్న పిల్లోడు బుల్లితెరపై అవలీలగా చెప్పేస్తుంటే చూసి బాలయ్య మురిసిపోయారు. ఒకానొక సందర్భంలో ఆ బుల్లి అభిమానిని కలిశారు కూడా. ఎంతో భవిష్యత్తు ఉన్న తన అభిమాని అకస్మాత్తుగా ఈ లోకం విడిచి వెళ్లిపోవడం బాలకృష్ణను తీవ్ర దిగ్భ్రాంతికి గురిచేసింది.
జీ తెలుగు ఛానెల్‌లో ప్రసారమయ్యే డ్రామా జూనియర్స్ కార్యక్రమంలో బాలయ్య స్పూఫ్‌లు చేస్తూ జూనియర్ బాలకృష్ణగా గుర్తింపు తెచ్చుకున్న కందుకూరి గోకుల్ సాయికృష్ణ మరణించాడు. డెంగ్యూ జ్వరంతో బాధపడుతున్న గోకుల్ బెంగళూరులోని ఓ ఆస్పత్రిలో చికిత్స పొందుతూ తుదిశ్వాస విడిచాడు. గోకుల్ మరణవార్త అతని కుటుంబ సభ్యులతో పాటు బాలకృష్ణ అభిమానులను షాక్‌కు గురిచేసింది. ఎంతో భవిష్యత్తు ఉన్న బాలనటుడు ఇలా అకస్మాత్తుగా ఈ లోకం నుంచి వెళ్లిపోవడాన్ని ఎవరూ జీర్ణించుకోలేకపోతున్నారు.
కాగా, తన అభిమాని మరణవార్త విన్న బాలకృష్ణ సోషల్ మీడియా ద్వారా స్పందించారు. ఈ మేరకు ఫేస్‌బుల్‌లో పోస్ట్ పెట్టారు. ‘‘మాకు అభిమానుల కంటే విలువైనది మరొకటి ఉండదు. అలాంటి చిన్నారి అభిమాని గోకుల్. నేనంటే ప్రాణం ఇచ్చే ఈ చిన్నారి ఈ రోజు ప్రాణాలతో లేడన్న నిజం నా మనసును కలచివేసింది. అతడు డైలాగులు చెప్పిన విధానం.. హావభావాలు చూసి నాకు ఎంతో ముచ్చటేసేది. ఎంతో భవిష్యత్తు ఉన్న ఈ చిన్నారి ఇంత చిన్న వయసులో డెంగ్యూ వ్యాధితో ఈ లోకాన్ని విడిచి వెళ్లడం చాలా బాధ కలిగించింది. ఈ చిన్నారి ఆత్మకు శాంతి కలగాలని కోరుకుంటూ.. అతని కుటుంబానికి నా ప్రగాఢ సానుభూతి తెలియజేస్తున్నాను’’ అని తన పోస్ట్‌లో పేర్కొన్నారు.