కోలీవుడ్ సూపర్ స్టార్ రజినీకాంత్, దర్శకుడు అశ్వత్ మారిముత్తు కాంబినేషన్లో తెరకెక్కుతున్న క్రేజీ ప్రాజెక్ట్ ‘ధర్మన్’ Dharman. ఈ సినిమాపై ఇప్పటికే భారీ అంచనాలు నెలకొన్నాయి. ఇందులో రజినీకాంత్ ఓ డెడ్లీ డాక్టర్ పాత్రలో కనిపించబోతున్నారని ప్రచారం జరుగుతుండటంతో సినిమాపై మరింత ఆసక్తి పెరిగింది. ప్రస్తుతం మేకర్స్ శరవేగంగా షూటింగ్ పూర్తి చేసే పనిలో ఉన్నారు.
ఇదిలా ఉంటే ‘ధర్మన్’కు సంబంధించి ఓ ఆసక్తికరమైన వార్త టాలీవుడ్ వర్గాల్లో చక్కర్లు కొడుతోంది. టాలీవుడ్ యంగ్ హీరో రామ్ పోతినేని కూడా ఈ సినిమాలో కీలక పాత్రలో నటిస్తున్నారనే టాక్ కొంతకాలంగా వినిపిస్తోంది. అంతేకాకుండా ఆయన సినిమాలో విలన్ పాత్రలో కనిపించబోతున్నారనే ప్రచారం కూడా జరిగింది.
తాజాగా ఈ వార్తలకు మరింత బలం చేకూర్చేలా మరో ఆసక్తికరమైన సమాచారం బయటకు వచ్చింది. రామ్ పోతినేని ఇప్పటికే ‘ధర్మన్’ షూటింగ్లో జాయిన్ అయ్యారని సినీ వర్గాల్లో టాక్ వినిపిస్తోంది. ఒకవైపు తన స్వీయ దర్శకత్వంలో తెరకెక్కుతున్న సినిమాకు సంబంధించిన పనుల్లో పాల్గొంటూనే, మరోవైపు ‘ధర్మన్’ షూటింగ్లో కూడా గ్యాప్ లేకుండా పాల్గొంటున్నారనే ప్రచారం జరుగుతోంది.
అంతేకాకుండా ‘ధర్మన్’లో రామ్ పోతినేని పాత్ర చాలా కీలకంగా ఉంటుందని, ఆయనకు మంచి స్క్రీన్ స్పేస్ కూడా ఉందని టాక్. ముఖ్యంగా రజినీకాంత్తో ఆయన కాంబినేషన్ సన్నివేశాలు సినిమాకు ప్రత్యేక ఆకర్షణగా నిలుస్తాయని సినీ వర్గాల్లో చర్చ జరుగుతోంది.
అయితే రామ్ పోతినేని ‘ధర్మన్’లో నటిస్తున్నారనే విషయంపై మేకర్స్ నుంచి ఇప్పటివరకు అధికారిక ప్రకటన రాలేదు. ఆయన పాత్ర విలన్దా? లేక కథలో మరో కీలక పాత్రనా? అనే విషయాలపై కూడా పూర్తి క్లారిటీ రావాల్సి ఉంది. ఒకవేళ ఈ కాంబినేషన్ నిజమైతే రజినీకాంత్, రామ్ పోతినేని కలిసి స్క్రీన్పై కనిపించడం అభిమానులకు గుడ్ ట్రీట్ అవుతుందని చెప్పొచ్చు.
