తెలంగాణలో ఎన్నికల ప్రచారం కీలక దశకు చేరుకున్న వేళ ప్రధాన పార్టీలు ప్రచారంపై ఫుల్ ఫోకస్ పెడుతున్నారు. ఇదే సమయంలో చేరికలపైనా దృష్టి సారిస్తున్నారు. కీలక నేతలను పార్టీలో చేర్చుకుంటూ కేడర్ను మరింత బలపరుచుకుంటున్నారు. ఇందులో బీఆర్ఎస్ పార్టీ కాస్త ముందంజలో ఉంది. కాంగ్రెస్, బీజేపీలో అసంతృప్త నేతలను పార్టీలోకి ఆహ్వానిస్తూ.. నియోజకవర్గాల్లో వారి ఓటు బ్యాంక్ను తమవైపు తిప్పుకుంటోంది.
ఇందులో భాగంగానే ఇవాళ తెలంగాణ భవన్లో రాష్ట్ర వైద్య ఆరోగ్య, ఆర్థిక శాఖల మంత్రి హరీశ్ రావు సమక్షంలో చేరికలు జరిగాయి. పలు పార్టీల నుంచి గులాబీ పార్టీలో నేతలు చేరారు. ముఖ్యంగా కాంగ్రెస్ పార్టీకి రాజీనామా చేసిన కత్తి కార్తీక హరీశ్ రావు సమక్షంలో బీఆర్ఎస్లో చేరారు. దుబ్బాక అభివృద్ధే ధ్యేయంగా గులాబీ కండువా కప్పుకున్నట్లు ఆమె తెలిపారు. మరోవైపు ఆమెను పార్టీలోకి ఆహ్వానించిన హరీశ్ రావు మాట్లాడుతూ.. కత్తి కార్తీక బీఆర్ఎస్లో చేరడం శుభ పరిణామం అన్నారు. పార్టీ ఆమెకు సముచిత స్థానం కల్పిస్తుందని హామీ ఇచ్చారు.
