ఏపీ పీసీసీ అధ్యక్షురాలు వై.ఎస్.షర్మిల బుధవారం బెంగళూరులో కర్ణాటక ఉపముఖ్యమంత్రి డీకే శివకుమార్, ఆయన సోదరుడు డీకే సురేశ్ (ఎంపీ)తో ప్రత్యేకంగా సమావేశమయ్యారు. సదాశివనగరలోని డీకే నివాసంలో ఆమె ఏపీ ఎన్నికల అంశాలపై చర్చించినట్లు సమాచారం. ఈ ఎన్నికల కోసం కర్ణాటక నుంచి ప్రముఖ నేతల ప్రచారంపై ఆమె డీకేకు పలు ప్రతిపాదనలు చేశారని తెలిసింది.
ఇప్పటికే కర్ణాటక నుంచి ఏపీలో ప్రచారం కోసం 10మంది నేతలతో కూడిన ప్రచారకుల జాబితాను తయారు చేయనున్నట్లు పీసీసీ ఇటీవల వెల్లడించింది. ఈ జాబితాలో డీకే శివకుమార్ ఉన్నారు. కర్ణాటకలో ఈనెల 12న రెండో విడత ఎన్నికల కోసం నామినేషన్ల ప్రక్రియ మొదలు కానుండగా ఆ రోజున ఏఐసీసీ అధ్యక్షుడు మల్లికార్జున ఖర్గే కలబురగిలో అభ్యర్థి తరఫున ప్రచారానికి వెళ్తారు. అనంతరం ఆంధ్ర, తమిళనాడు, తెలంగాణాల్లో ప్రచారానికి వెళ్లే నేతల వివరాలను వెల్లడిస్తారు.
