దిల్లీలో G20 దేశాల 9వ పార్లమెంటరీ స్పీకర్ల సదస్సు ఈ నెల 12వ తేదీ నుంచి 14వ తేదీ వరకు జరగనుంది. ద్వారకాలో కొత్తగా నిర్మించిన అంతర్జాతీయ కన్వెన్షన్ సెంటర్ యశోభూమి ఈ సదస్సుకు వేదిక కానుందని లోక్సభ స్పీకర్ ఓం బిర్లా వెల్లడించారు. ఈ సదస్సులో జర్మనీ, అర్జెంటీనా మినహా మిగిలిన జి20 సభ్యదేశాలు, 9 ఆహ్వానిత దేశాల సభాపతులు, ఇంటర్పార్లమెంటరీ యూనియన్, కామన్వెల్త్ పార్లమెంటరీ అసోసియేషన్ ప్రతినిధులు పాల్గొంటారని తెలిపారు. మొత్తం 50 మంది పార్లమెంటు సభ్యులు, 26 మంది స్పీకర్లు, 10 మంది డిప్యూటీ స్పీకర్లు, 14 మంది సెక్రటరీ జనరళ్లు, 1 కమిటీ ఛైర్మన్, 1 ఇంటర్ పార్లమెంటరీ యూనియన్ ప్రెసిడెంట్ వస్తున్నట్లు పేర్కొన్నారు.
తొలిసారి ఆఫ్రికన్ పార్లమెంట్ ప్రెసిడెంట్ ఈ సదస్సులో పాల్గొంటున్నారు. గతంలో ఏ సదస్సుకూ హాజరుకానంత మంది ప్రతినిధులు దీనికి హాజరుకాబోతున్నారు. ప్రస్తుతం ప్రపంచవ్యాప్తంగా ఎదురవుతున్న సవాళ్లకు పరిష్కారం చూపే దిశగా ఇందులో చర్చలు నిర్వహించనున్నట్లు స్పీకర్ ఓం బిర్లా వెల్లడించారు. వివిధ పార్లమెంటుల్లో అనుసరిస్తున్న అత్యుత్తమ విధానాలపై చర్చించనున్నట్లు తెలిపారు. మూడ్రోజుల పాటు జరగనున్న ఈ సదస్సులో…
1. 2030 నాటికి సుస్థిర అభివృద్ధి లక్ష్యాల సాధన,
2. పబ్లిక్ డిజిటల్ ప్లాట్ఫామ్స్ ద్వారా ప్రజల జీవితాల్లో వచ్చిన మార్పులు,
3. మహిళాధారిత అభివృద్ధి,
4. సుస్థిర ఇంధనం దిశగా రూపాంతరం అనే అంశాలపై చర్చ జరగనుంది.