తాజాగా తమిళనాడు మాజీ ముఖ్యమంత్రి, దివంగత నేత జయలలిత బయోపిక్‌ను తలైవీ పేరుతో తెరకెక్కిస్తున్న సంగతి తెలిసిందే. బాలీవుడ్ బ్యూటీ కంగనా రనౌత్‌ జయలలిత పాత్రలో నటిస్తున్న ఈ సినిమాలో ఎంజీ రామచంద్రన్ పాత్రలో అరవింద్‌ స్వామి నటిస్తుండగా కరుణానిధిగా ప్రకాష్ రాజ్‌ నటిస్తున్నాడు. అయితే సినిమాలో సీనియర్ ఎన్టీఆర్‌ పాత్ర కూడా కనిపించనుంది.
ఈ పాత్రలో బాలయ్య నటిస్తున్నట్టుగా చాలా రోజులుగా ప్రచారం జరుగుతోంది. అయితే తాజా సమాచారం ప్రకారం బాలయ్యకు బదులుగా ఎన్టీఆర్‌ పాత్రకు జూనియర్‌ ఎన్టీఆర్‌ను తీసుకునే ఆలోచనలో ఉన్నారట చిత్రయూనిట్‌. ఎన్టీఆర్‌ తాత పాత్రలో నటించేందుకు అంగీకరిస్తే భారీ పారితోషికం ఇచ్చేందుకు కూడా రెడీ అయినట్టుగా తెలుస్తోంది. ఎన్టీఆర్‌ ఒక్క సీన్‌లో కనిపించినా తెలుగు వర్షన్‌కు మంచి బిజినెస్‌ జరుగుతుందని టాక్‌ వినిపిస్తోంది.
అయితే గతంలో మహానటి సినిమా సమయంలోనూ ఎన్టీఆర్‌ను తాత పాత్రలో నటింప చేసేందుకు ప్రయత్నాలు జరిగాయి. కానీ అప్పట్లో ఎన్టీఆర్‌ ఆ ఆఫర్‌ను తిరస్కరించాడు. మరి ఇప్పుడు తలైవీ టీం ఇదే ప్రపోజల్‌ పెడితే యంగ్‌ టైగర్‌ ఓకే చెప్తాడా అన్న టాక్‌ వినిపిస్తోంది.