జాతీయ స్థాయిలో కాంగ్రెస్, బీజేపీలకు ప్రత్యామ్నాయ కూటమి ఏర్పాటుకు ప్రయత్నిస్తోన్న తెలంగాణ ముఖ్యమంత్రి కేసీఆర్ వివిధ ప్రాంతీయ పార్టీల నేతలతో వరుసగా భేటీ అవుతున్నారు. ఇందులో భాగంగా ఆదివారం నాడు ఒడిశా ముఖ్యమంత్రి నవీన్ పట్నాయక్‌, నిన్న పశ్చిమ్ బెంగాల్ సీఎం మమతా బెనర్జీని కలుసుకున్నారు. ఫెడరల్ ఫ్రంట్ ఏర్పాటు మీద ఆయా నేతలతో చర్చించిన అనంతరం, కేసీఆర్ సంయుక్తంగా మీడియా సమావేశంలో మాట్లాడారు. అయితే, కోల్‌కతాలో మమతతో కలిసి నిర్వహించిన మీడియా సమావేశం మాత్రం భిన్నంగా సాగింది. ఈ సమావేశంలో పాల్గొన్నప్పుడు మాత్రం తన సహజశైలికి భిన్నంగా మమతా బెనర్జీ వ్యవహరించారు. వాస్తవానికి తృణమూల్ కాంగ్రెస్ అధినేత్రికి మౌనంగా ఉండరు. తన మనసులో మాటలను కుండబద్దలు కొట్టినట్టు మీడియా ముందు చెప్పేస్తారు. గబగబా మాట్లాడేయడం ఆమెకు అలవాటు. ఫెడరల్ ఫ్రంట్‌పై చర్చించేందుకు గత మార్చిలోనూ కేసీఆర్ కోల్‌కతాకు వెళ్లి మమతా బెనర్జీని కలిశారు. అప్పుడు ఇద్దరూ కలిసి మీడియా సమావేశంలో పాల్గొన్నారు.
ఆ సమయంలో పశ్చిమ్ బెంగాల్ సీఎం తన ఆలోచనల గురించి వెల్లడించారు. సోమవారం కేసిఆర్‌తో సమావేశమైన తర్వాత ఇద్దరూ మీడియా ముందుకు వచ్చారు. భేటీ వివరాలు, తమ కూటమి ప్రాధామ్యాల గురించి కేసీఆర్ వివరించారు. కానీ, కేసిఆర్ మాట్లాడుతున్నంత సేపు మమతా బెనర్జీ మౌనంగా ఉండిపోయారు. గతంలో మాదిరిగా ఎలాంటి వ్యాఖ్యలు చేయలేదు. అంతేకాదు, చివరలో మాత్రం కేసిఆర్ చెప్పిన విషయాలతో తాను పూర్తి స్థాయిలో ఏకీభవించడం లేదన్నారు. జాతీయ స్థాయిలో ప్రాంతీయ పార్టీలు ప్రముఖ పాత్రను పోషించాలని మమతా బెనర్జీ తొలి నుంచీ కోరుకుంటున్నారు. ప్రాంతీయ పార్టీలను ఏకతాటిపైకి తెచ్చేందుకు ప్రయత్నాలు సాగిస్తున్నారు. అయితే, అలాగని కాంగ్రెస్‌ను పూర్తిగా వ్యతిరేకించడం లేదు. అంతేకాదు, ప్రాంతీయ పార్టీల బలంతో బీజేపీని నిలువరించాలని కూడా భావిస్తున్నారు. బిజేపీకి వ్యతిరేకంగా తమతో కాంగ్రెస్ తోడ్కొని వెళ్లాలనే ఆమె భావిస్తున్నారు. గత ఏడాది ప్రారంభం నుంచే ప్రతిపక్ష నేతలతో సమావేశమవుతూ వస్తున్నారు. ఇక డిసెంబరు 10న కూడా చంద్రబాబు సారథ్యంలోని బీజేపీ వ్యతిరేక పార్టీలు నిర్వహించిన సమావేశానికి మమత హాజరయ్యారు. ఎన్సీపీ నేత శరద్ పవార్, ఢిల్లీ సీఎం అరవింద్ కేజ్రీవాల్, శివసేన అధినేత ఉద్ధవ్ థాకరే, ఎన్సీ నేత ఫరూక్ అబ్దుల్లాలతో గత శుక్రవారం కోల్‌కతాలో ఆమెతో భేటీ అయ్యారు. గత ఆగస్టులో తన ఢిల్లీ పర్యటన సందర్భంగా కాంగ్రెస్ అధ్యక్షుడు రాహుల్ గాంధీ, యూపీఏ ఛైర్మన్ సోనియాలను కూడా కలిశారు. ఇక, కేంద్రంలోని ఎన్డీఏ కూటమికి వ్యతిరేకంగా జనవరి 18న కోల్‌కతాలో భారీ ర్యాలీ నిర్వహించనున్న మమత, అన్ని ప్రతిపక్ష పార్టీలను ఆహ్వానించారు. ఇక, సోమవారం నాటి మౌనం కేసిఆర్ ఎజెండా మేరకు ముందుకు నడవడానికి సిద్ధంగా లేరనేది అర్థమవుతోంది.
