దక్షిణ కన్నడ జిల్లాలో బీజేపీ యువ కార్యకర్త ప్రవీణ్‌కుమార్‌ నెత్తారే హత్యకు ప్రతీకారంగా 23 ఏళ్ల మహ్మద్‌ ఫాజిల్ హత్య జరిగినట్లు దర్యాప్తులో వెల్లడైంది.
జూలై 28న జరిగిన ఫాజిల్ హత్యకు సంబంధించి ముగ్గురు రౌడీషీటర్లతో సహా ఆరుగురిని పోలీసులు అరెస్ట్ చేశారు. జూలై 26న నరికి చంపిన ప్రవీణ్ హత్యకు ప్రతీకారంగా నిందితులు నేరం అంగీకరించారు.
సుహాస్ శెట్టి (29), మోహన్ (26), గిరిధర్ (23), అభిషేక్ (21), శ్రీనివాస్ (23), దీక్షిత్ (21)లను పోలీసులు అరెస్టు చేశారు.
సుహాస్ శెట్టి భజరంగ్ దళ్ గోరక్ష యూనిట్ సభ్యుడు అని పోలీసులు తెలిపారు. అతనిపై హత్య ఆరోపణలు రావడంతో 2020లో బహిష్కరించబడ్డాడు. మరో ఐదుగురికి హిందూత్వ సంస్థలతో సంబంధాలున్నాయని, పోలీసులు ఈ కోణంలో సమాచారాన్ని సేకరిస్తున్నారు.
ఈ కేసుకు సంబంధించి పోలీసులు ఇప్పటి వరకు ఏడుగురిని అరెస్టు చేశారు. ఫాజిల్ హత్య కేసును పోలీసు శాఖ చేధించిందని హోంమంత్రి ఆరగ జ్ఞానేంద్ర ప్రకటించారు.
ప్రవీణ్ హత్యకు ప్రతీకారంగా ప్రవీణ్ హత్య జరిగిన రోజున ముస్లిం వర్గానికి చెందిన వ్యక్తిని ట్రాప్ చేసేందుకు ముఠా సిద్ధమైందని పోలీసు వర్గాలు తెలిపాయి. ప్రధాన నిందితుడు సుహాస్ శెట్టి హత్యకు ప్లాన్ చేసి ఇతర టీమ్ సభ్యులను కూడగట్టాడు.
ఫాజిల్ హత్యకు ప్రేమ, వివాదాలు, మరే ఇతర కారణాలు లేవని మంగళూరు పోలీస్ కమిషనర్ ఎన్.శశికుమార్ తెలిపారు. ప్రతీకారంగా నిందితులు అతడిని లక్ష్యంగా చేసుకున్నారు.
నిందితులను అదుపులోకి తీసుకుని తదుపరి విచారణ చేపడతామని పోలీసులు తెలిపారు.
మతోన్మాద శక్తులు, సంఘవిద్రోహశక్తుల కార్యకలాపాలను కట్టడి చేసేందుకు కోస్తా జిల్లాలో స్పెషల్ డ్రైవ్ నిర్వహించనున్నట్లు కర్ణాటక పోలీసు శాఖ ప్రకటించింది.
